Ulla Broc­ken­huus-Schack, með­stofnandi danska fram­taks­sjóðsins Seed Capi­tal, segist hafa fengið fjár­festingu sína í bandaríska örflögu­f­ram­leiðandanum Nvidia rúm­lega fjórtán­falt til baka á fimm árum. Frá þessu segir hún í viðtali og hlað­varpsþætti Børsen, How I Invest, þar sem hún fer yfir eigin fjár­festingar­stefnu, bestu og verstu fjár­festingar sínar og hvernig hún leitar að félögum sem geti orðið leiðandi á sínum markaði. Brockenhuus-Schack hefur um áratugaskeið verið meðal sýnilegustu fjárfesta í framtaksfjárfestingum í Danmörku. Í gegnum sjóð sinn Seed Capi­tal hefur hún komið að fjár­festingum í meira en 250 sprota­fyrir­tækjum og meðal annars tengst félögum á borð við Trust­pilot, Vivino og Endomondo. Í einka­fjár­festingum sínum beitir hún svipaðri hugsun: að greina stórar breytingar í hag­kerfinu og finna þau félög sem lík­legust eru til að standa uppi sem sigur­vegarar. Í sam­tali við Børsen segir hún að hún hafi farið snemma inn í örflögu­geirann og byggt upp breitt safn slíkra hluta­bréfa, þó einkum í Nvidia. Upp­haf­lega hafi hún sett hálfa milljón danskra króna í félagið, sem sam­svarar um 9,5 milljónum ís­lenskra króna á gengi dagsins, en á fimm árum hafi hún fengið þá fjár­festingu 14 til 15 sinnum til baka. Hún segist hafa aukið við stöðuna nokkrum sinnum, en jafn­framt selt hluta síðar til að tryggja að vægi Nvidia í safninu yrði ekki of mikið. Að hennar sögn snýst stefnan um að greina megin­strauma og finna „flokks­leið­togana“ innan hvers geira. Þegar hún komi auga á áhuga­verða þróun reyni hún jafnan að finna þrjú til fjögur félög innan sama flokks, þó að mark­miðið sé ætíð að finna það félag sem verði sterkast til lengri tíma litið. Þar séu mestu verðmætin fólgin. Broc­ken­huus-Schack segist einkum horfa til tækni­geirans, stærstu bandarísku tækni­fyrir­tækjanna og lyfja­fyrir­tækja sem tengjast of­fitu­með­ferðum. Hún er með um þrjátíu hluta­bréf í safni sínu. Þá segir hún að fjár­festingar hennar hafi í reynd gegnt hlut­verki líf­eyris­sparnaðar, enda hafi hún verið sjálf­stætt starfandi stóran hluta starfsævinnar og fremur byggt eigin framtíðar­sjóð með fjár­festingum en hefðbundnum hætti. Í viðtalinu segir hún jafn­framt að hún telji sig hafa að minnsta kosti tvöfaldað tekjur sínar með hluta­bréfa­fjár­festingum á síðustu tuttugu árum. Megin­reglan sé ein­föld: þar sem breytingar verði, skapist einnig tækifæri. Sú hugsun hafi verið leiðar­ljós hennar bæði í starfi og eigin fjár­festingum. Fjárfesti í Novo Nordisk úr námsmannaíbúð Verstu fjár­festingarnar hafa að hennar sögn einkum verið á sviði mat­væla. Hún nefnir þar félög á borð við Oatly og Beyond Meat, sem hún segir hafa verið afar sterk í markaðs­setningu og vel stað­sett innan nýrra neyslu- og um­hverfis­strauma, en hafi hins vegar ekki náð að byggja upp rekstur sem stæðist kröfur mat­væla­geirans um gæði, af­hendingar­getu og lágt verð. Þær fjár­festingar hafi fallið um 60 til 70 pró­sent, þótt hún taki fram að upp­haf­legu fjár­hæðirnar hafi verið litlar. Fyrsta hluta­bréfa­fjár­festing hennar var í Novo árið 1988, skömmu eftir að hún hóf störf hjá McKins­ey. Þá bjó hún enn í 42 fer­metra náms­mannaíbúð og hafði, eins og hún lýsir sjálf, lítið svigrúm en þó nægi­legt til að byrja að fjár­festa. Sú ákvörðun markaði upp­hafið að langri fjár­festinga­leið sem síðar átti eftir að gera hana að einu þekktasta nafni á sviði fram­taks­fjár­festinga í Dan­mörku. Í um­fjöllun Børsen kemur fram að lykillinn að árangri hennar sé ekki síst sá að horfa snemma til stórra breytinga og reyna að stað­setja sig þar sem nýir markaðs­leið­togar verða til. Nvidia er, sam­kvæmt hennar eigin frásögn, skýrasta dæmið um slíka nálgun í fram­kvæmd.