Stærstu fjár­festingar­bankar Bandaríkjanna stefna í besta fjórðung sinn í þóknana­tekjum frá árinu 2021, knúnir áfram af risastóru frumút­boði SpaceX og endur­komu stórra sam­runa og yfir­taka á alþjóð­legum mörkuðum. Fimm stærstu fjár­festingar­bankar Bandaríkjanna, JP­Morgan Chase, Gold­man Sachs, Morgan Stanl­ey, Bank of America og Citigroup, eru taldir hafa aukið þóknana­tekjur sínar af fjár­festingar­banka­starf­semi um 27% á öðrum árs­fjórðungi frá sama tíma í fyrra, sam­kvæmt spám sem Bloom­berg hefur tekið saman og Financial Times fjallar um. Gangi spáin eftir munu þóknana­tekjurnar nema sam­tals 11,1 milljarði dala. Það yrði hæsta fjár­hæðin í fjögur og hálft ár og sú mesta frá árinu 2021, þegar um­svif í fjár­festinga­banka­starf­semi náðu síðast há­marki. Viðsnúningurinn kemur í kjölfar sterks fjórðungs á bandarískum hluta­bréfa­markaði, þrátt fyrir óvissu og sveiflur vegna stríðsá­taka við Íran. Bjartsýni í kringum fjár­festingar í gervi­greind, lægra olíu­verð og merki um áfram­haldandi styrk bandarískra neyt­enda studdu við hækkun hluta­bréfa á fjórðungnum. Stærsti ein­staki þátturinn er endur­koma hluta­fjárút­boða. Þóknanir vegna hlutafjárútboða og annarrar fjármögnunar á hlutabréfamarkaði eru taldar hafa numið 2,5 milljörðum dala hjá bönkunum fimm á fjórðungnum. Þar vó frumútboð SpaceX þungt, en 23 fjárfestingabankar fengu samtals um 500 milljónir dala í þóknanir vegna útboðsins. Það eru hæstu þóknanir sem greiddar hafa verið í hlutafjárútboði. Goldman Sachs og Morgan Stanley fengu hvor um sig um 100 milljónir dala fyrir sína aðkomu að útboðinu. Grein­endur benda á að ný kynslóð stórra tækni­fyrir­tækja geti haldið lífi í út­boðs­glugganum. Auk SpaceX eru OpenAI og Ant­hropic nefnd sem dæmi um félög sem gætu orðið meðal stærstu skráninga næstu ára. Minni félög í eigu fram­taks­sjóða hafa hins vegar síður komist á markað, meðal annars vegna hærri vaxta og varfærnari verðlagningar fjár­festa. Sam­runar og yfir­tökur hafa einnig tekið við sér. Þóknanir af slíkum ráðgjafar­verk­efnum hjá bönkunum fimm eru taldar hafa aukist um 30% frá öðrum árs­fjórðungi í fyrra og farið yfir fjóra milljarða dala. Það yrði í fyrsta sinn frá árinu 2021 sem þóknanir af sam­runum og yfir­tökum eru yfir þeim mörkum þrjá fjórðunga í röð. Stóru við­skiptin skipta þar mestu. Wall Street hefur notið góðs af endur­komu sam­runa og yfir­taka sem nema yfir tíu milljörðum dala. Morgan Stanl­ey sagði í ný­legri greiningu til við­skipta­vina að alþjóð­legar til­kynningar um sam­runa og yfir­tökur á árinu 2026 stefndu í mesta um­fang sem mælst hefur. Stóru bandarísku bankarnir birta upp­gjör sín á næstu dögum. JP­Morgan, Gold­man Sachs, Morgan Stanl­ey, Bank of America, Citigroup og Wells Far­go eru sam­tals taldir hafa skilað um 44 milljarða dala hagnaði á öðrum árs­fjórðungi, sem væri 18% aukning frá sama tíma í fyrra. Við­skipta­deildir bankanna njóta einnig góðs af sveiflum á mörkuðum, þar sem bankarnir auðvelda við­skipta­vinum að taka stöður, verja áhættu og fjár­magna við­skipti. Sér­stak­lega er búist við sterkri af­komu í hluta­bréfa­við­skiptum. Góð af­koma kemur á sama tíma og útlána­tap hefur verið hóf­legt. Það hefur stutt við hækkun banka­bréfa, sem hafa þróast betur en breiðari hluta­bréfa­markaður síðustu tvö ár. Sú þróun hefur þó einnig hækkað væntingar fjár­festa.