Andrew Bail­ey, seðla­banka­stjóri Eng­lands­banka, varar við aukinni áhættu í fjár­mála­kerfinu og segir skuld­setningu á mörkuðum vera sér­stakt áhyggju­efni. Bail­ey lét um­mælin falla þegar hann kom fyrir fjár­laga­nefnd breska þingsins, Treasury Select Commi­ttee fyrr í dag, Í upp­hafi fundarins sagði hann að fjár­málaáhætta hefði aukist, meðal annars vegna þróunar í heims­bú­skapnum og sér­stak­lega vegna stöðunnar fyrir botni Persaflóa. Hann nefndi einnig áhrif gervi­greindar sem þátt sem seðla­bankinn fylgist náið með. Bail­ey sagði að aukin notkun láns­fjár hjá vogunar­sjóðum og öðrum fjár­festingar­sjóðum gæti magnað sveiflur á mörkuðum. „Við stöndum frammi fyrir vanda­máli tengdu gírun á fjár­málamörkuðum,“ sagði Bail­ey við þing­menn. Með gírun er átt við að fjár­festar noti láns­fé til að stækka stöður sínar og auka mögu­lega ávöxtun. Sama að­ferð getur þó einnig magnað tap ef markaðir þróast gegn þeim. Bail­ey sagði að á síðustu mánuðum hefði aukin gírun sést bæði á hluta­bréfa­mörkuðum og í kaup­hallar­sjóðum, eða ETF-sjóðum. Slíkir sjóðir eru meðal annars notaðir af al­mennum fjár­festum til að fjár­festa í ákveðnum mörkuðum, löndum eða at­vinnu­greinum. Hann sagði að stjórn­völd og eftir­lit­saðilar þyrftu að meta hvort herða þyrfti reglur um slíka skuld­setningu. Spurningin væri hvort bregðast ætti við innan banka­reglu­verksins eða markaðs­reglu­verksins. Bail­ey sagðist sjálfur telja eðli­legra að takast á við vandann í gegnum reglur um fjár­mála­markaði fremur en banka­kerfið. Seðla­banka­stjórinn ræddi einnig þróun elds­neytis­verðs. Hann sagði þing­mönnum að verð á bensíni og dísilolíu hefði ekki lækkað jafn hratt og heims­markaðsverð á hráolíu eftir að dregið hafði úr spennu í Mið-Austur­löndum á síðustu mánuðum. Bail­ey benti á að verð á unnum olíu­vörum, þar á meðal bensíni og dísilolíu, hefði ekki lækkað jafn mikið og verð á hráolíu. Samtök bifreiðaeigenda í Bretlandi, RAC og AA, greindu jafn­framt frá því á mánu­dag að elds­neytis­verð væri aftur farið að hækka í kjölfar nýrrar spennu í Mið-Austur­löndum. Bail­ey undir­strikaði einnig mikilvægi trúverðugrar fjár­mála­stefnu fyrir stöðug­leika á mörkuðum. Hann sagði stærstu sveiflurnar á fjár­málamörkuðum nú fyrst og fremst ráðast af alþjóð­legum þáttum, en að staða Bret­lands nyti stuðnings frá peninga­legum stöðug­leika, fjár­málastöðug­leika og ramma ríkis­fjár­málanna.