SpaceX, geim-, gervi­hnatta- og gervi­greindar­félag Elon Musk, hefur safnað 75 milljörðum dala í hluta­fjárút­boði sem er sagt það stærsta í sögunni. Hluta­bréf félagsins voru verðlögð á 135 dali á hlut og er gert ráð fyrir að við­skipti með bréfin hefjist á Nas­daq í dag. Sam­kvæmt Financial Times seldi SpaceX 555,6 milljónir hluta í út­boðinu. Heildar­fjár­hæðin gæti hækkað í 86 milljarða dala nýti sölu­tryggj­endur heimild til að selja viðbótar­hluti, svo­kallaðan greens­hoe-rétt. Slík heimild er algeng í stórum hlutafjárútboðum og gerir sölutryggjendum kleift að kaupa eða selja fleiri hluti en upphaflega var gert ráð fyrir, yfirleitt til að mæta mikilli eftirspurn og styðja við stöðugleika í viðskiptum með bréfin eftir skráningu. Nýti þeir heimildina að fullu yrði SpaceX metið á um 1,78 billjónir dala. Fjár­mununum verður meðal annars varið í gervi­greindarinn­viði, ný gervi­hnatta­kerfi og endur­fjár­mögnun skulda. Sam­kvæmt FT þarf um 20 milljarða dala hluti af út­boðs­fénu að fara í að greiða niður brúar­lán sem félagið tók í mars, eftir að Musk sam­einaði skuld­sett gervi­greindar- og sam­félags­miðla­fyrir­tæki sín við SpaceX. Musk sagði á kynningar­fundi með fjár­festum í síðustu viku að félagið væri að hefja „gríðar­legt nýtt vaxtar­skeið“ sem kallaði á aukið fjár­magn. Hann hefur einnig kynnt hug­myndir um gagna­ver í geimnum, sem hann telur geta leyst orku­tak­markanir á jörðu. Verðmatið er þó hátt í sögu­legu sam­hengi. Sam­kvæmt FT er SpaceX taprekið og er verðmatið um 92 sinnum tekjur félagsins síðustu tólf mánuði, sem námu 19 milljörðum dala. Grein­endur Gold­man Sachs, sem er meðal aðalum­sjónaraðila út­boðsins, spá því að gervi­greindar­tekjur SpaceX geti hundraðfaldast og numið 322 milljörðum dala árið 2030. Með skráningunni verður SpaceX eitt verðmætasta skráða félag Bandaríkjanna. Nas­daq hefur jafn­framt samþykkt reglur sem gera félaginu kleift að komast inn í Nas­daq 100-vísitöluna eftir 15 við­skipta­daga. FTSE Rus­sell hefur gengið enn lengra og heimilað hraðari inn­komu í Rus­sell 1000 og Rus­sell 3000 vísitölurnar eftir fimm við­skipta­daga. Sjá einnig Söguleg eftirspurn í SpaceX