Bandaríski hluta­bréfa­markaðurinn hefur ekki hækkað á þessu ári vegna vaxandi spá­kaup­mennsku eða sí­fellt hærra verðmats, heldur vegna þess að hagnaður fyrir­tækja hefur verið óvenju sterkur. Þetta segir Ben Sni­der, aðal­hluta­bréfa­stefnumótandi Gold­man Sachs í Bandaríkjunum, í aðsendri grein í Financial Times, þar sem hann fjallar um þá um­ræðu hvort gervi­greindar­upp­sveiflan sé að blása upp nýja bólu á hluta­bréfa­markaði. Sni­der segir að áhyggjur fjár­festa hafi aukist að undan­förnu, ekki síst eftir sveiflur á markaði og skarpa lækkun Nas­daq vísitölunnar. En þótt verðmat bandarískra hluta­bréfa sé hátt og markaðurinn mjög samþjappaður í kringum stærstu tækni­fyrir­tækin, segir hann myndina aðra en klassíska bólu­myndun. „Gögnin segja aðra sögu,“ skrifar Sni­der. Að hans mati hefur hækkun hluta­bréfa í Bandaríkjunum í ár fyrst og fremst byggst á raun­veru­legum hagnaðar­vexti. Hagnaðu á hlut hjá fyrir­tækjum í S&P 500 vísitölunni jókst um 18% á fyrsta árs­fjórðungi frá fyrra ári, þegar leiðrétt er fyrir til­teknum ein­skiptisliðum. Sé litið fram hjá stærstu tækni­risunum nam hagnaðar­vöxtur mið­gildis­fyrir­tækisins í vísitölunni 14 pró­sentum. Sni­der segir það gera árs­fjórðunginn þann sterkasta í meira en ára­tug, ef frá eru talin áhrif skattalækkana í Bandaríkjunum árið 2018 og endur­opnun hag­kerfisins eftir heims­far­aldurinn árið 2021. Af­komu­spár grein­enda hafa einnig hækkað. Frá áramótum hafa grein­endur á Wall Street hækkað spár sínar fyrir hagnað fyrir­tækja í S&P 500 bæði árin 2026 og 2027. Þá hafa fleiri afkomuspár hækkað en lækkað að undanförnu. Þetta skiptir máli fyrir mat á því hvort um bólu sé að ræða. Sni­der bendir á að hagnaðar­spár hafi hækkað hraðar en hluta­bréfa­verð. S&P 500 vísi­talan hefur hækkað um það bil 10% frá áramótum, en væntur hagnaður hefur hækkað um 15%. Fyrir vikið hefur fram­virkt V/H-hlut­fall vísitölunnar lækkað úr 22 í 21, þrátt fyrir hækkun markaðarins. Með öðrum orðum: Fjár­festar eru ekki að greiða sí­fellt hærra verð fyrir sama hagnað. Sni­der segir þó að fjár­festing í inn­viðum tengdum gervi­greind sé helsto drif­kraftinn að baki af­komu­styrk bandarískra fyrir­tækja. Upp­bygging gagna­vera og tengdra inn­viða muni að hans mati standa undir um helmingi hagnaðar­vaxtar S&P 500 í ár og á næsta ári. Grein­endur gera nú ráð fyrir að fimm stærstu tæknirisarnir, Alp­habet, Amazon, Meta Plat­forms, Micros­oft og Orac­le, verji sam­tals 755 milljörðum dala í fjár­festingar á þessu ári. Það væri 83% aukning frá fyrra ári. Þessi fjár­festingar­bylgja skýrir einnig hvers vegna hluta­bréf örgjörva­fyrir­tækja og annarra fyrir­tækja sem selja búnað, orku­inn­viði og aðföng inn í gervi­greindar­upp­bygginguna hafa hækkað mikið. Sni­der vísar til þess að safn slíkra fyrir­tækja hafi hækkað um 33% á árinu, á sama tíma og af­komu­spár þeirra hafi hækkað um 30%. Stóra spurningin er hvort þessi fjár­festingar­bylgja fjari út áður en arð­semin af henni verður sýni­leg víðar í bandarísku at­vinnulífi. Sni­der segir þá um­breytingu ekki sjálf­gefna. Enn sem komið er sjái hann þó lítil merki um að fjár­festingaræðið sé að hægja á sér. Þvert á móti hafi fjár­festingaráætlanir vegna gagna­vera og gervi­greindar hækkað stöðugt undan­farin þrjú ár. Hann varar þó við því að leiðin fram undan verði ekki endilega greið. Hlutabréf eru dýr í sögulegu samhengi og markaðurinn er óvenju samþjappaður. Tíu stærstu félögin í S&P 500 standa nú undir 41 prósenti af markaðsvirði vísitölunnar, sem er hæsta hlutfall í áratugi. Þá sé efna­hags­um­hverfið enn krefjandi. Sni­der nefnir meðal annars áhrif olíu­verðs­hækkana vegna lokunar Hor­mússunds, sem geti þrýst á fram­legð fyrir­tækja, ráðstöfunar­tekjur neyt­enda og vexti. Auk þess sé fram­boð nýrra hluta­bréfa að aukast, meðal annars með væntan­legri bylgju frumút­boða, sem geti aukið sveiflur á markaði. Sni­der segir þessar áhættur raun­veru­legar. Hann telur þó að þær hafi enn ekki rofið þann hagnaðar­kraft sem hefur borið hluta­bréfa­markaðinn uppi. Þess vegna sé saman­burður við lok tíunda ára­tugarins ekki fylli­lega réttur. Þá hafi fjár­festar keyrt upp verðmats­stuðla í von um hagnað langt fram í tímann. Nú hafi hluta­bréfa­verð og hagnaðar­spár hins vegar hreyfst mun meira í takt. „Svo lengi sem hagnaðar­aukningin heldur áfram ætti hækkunin að gera það líka,“ skrifar Sni­der.