Fjár­festing í ís­lenska hag­kerfinu tekur tíma­bundna dýfu í ár eftir fimm ára upp­sveiflu. Sam­kvæmt nýrri þjóðhags­spá Ís­lands­banka dregst fjár­muna­myndun saman um 3,8 pró­sent á árinu, áður en hún tekur smám saman við sér á ný á næstu tveimur árum. Fjár­festingar jukust um fjögur pró­sent í fyrra. Það var þó mun hægari vöxtur en á undan­förnum árum, enda hafði fjár­festing vaxið að jafnaði um rúm átta pró­sent frá miðjum síðasta ára­tug, sam­kvæmt greiningu bankans. Upp­sveiflan hefur einkum verið borin uppi af at­vinnu­vega­fjár­festingu. Ferðaþjónusta, sjávarút­vegur og upp­lýsingatækni hafa átt stóran þátt í þeirri þróun, auk mikillar upp­byggingar í gagna­verum og fisk­eldi á síðustu misserum. Nú hefur hins vegar hægt veru­lega á. Ís­lands­banki spáir því að fjár­festing at­vinnu­vega dragist saman um 5,4 pró­sent í ár og að íbúða­fjár­festing dragist saman um 3,5 pró­sent. Fjár­festing hins opin­bera vex á móti um 3,5 pró­sent, en það dugar ekki til að vega upp sam­dráttinn í einka­geiranum. „Að hluta til skýrist minni fjár­festing fyrir­tækja af kafla­skilum í upp­byggingu gagna­vera eftir mikinn vaxtar­sprett,“ segir í greiningu bankans. Þar er einnig vísað til minni fjár­festingar í farar­tækjum, vél­búnaði, hótelum og at­vinnu­húsnæði. Háir raun­vextir og krefjandi aðstæður í út­flutnings­greinum setja einnig mark sitt á fjár­festingará­form fyrir­tækja. Þótt upp­bygging í gagna­verum og fisk­eldi hafi vegið á móti á undan­förnum fjórðungum telur bankinn að sam­drátturinn í ár verði nokkuð breiður í einka­geiranum. Horfur eru þó á viðsnúningi þegar líður á spátímann. Ís­lands­banki spáir 0,5 pró­senta vexti fjár­festingar á næsta ári og 3,0 pró­senta vexti árið 2028. Þar vegur þyngst að bankinn gerir ráð fyrir lægri vöxtum, betri horfum í út­flutnings­greinum og áfram­haldandi upp­byggingu í orku­inn­viðum og land­eldi. Íbúða­fjár­festing á einnig að taka við sér síðar á spátímanum, þegar vaxta­stig lækkar og eftir­spurn á íbúða­markaði eykst. Bankinn spáir 3,8 pró­senta vexti íbúða­fjár­festingar á næsta ári og 7,5 pró­senta vexti árið 2028. Við­spyrnan er þó ekki sjálf­gefin. Ís­lands­banki bendir á að tafir í orkuöflun eða breytingar á ytra um­hverfi fyrir­tækja geti ráðið miklu um það hvort fjár­festingar taki jafn kröftug­lega við sér og spáin gerir ráð fyrir. „Sem fyrr styður eitt og annað við krónuna á næstunni. Út­lit er fyrir minnkandi við­skipta­halla við útlönd, er­lend staða þjóðar­búsins er sterk, gjald­eyris­forði Seðla­bankans myndar­legur, stoðir hag­kerfisins traustar og vaxta­munur við útlönd verður áfram nokkur,“ segir í greiningu bankans.