Akkur spáir því að Ís­lands­banki hafi hagnast um 6,5 milljarða króna á öðrum árs­fjórðungi. Það væri um 9% minni hagnaður en á sama tíma í fyrra, þegar bankinn hagnaðist um 7,2 milljarða króna. Ís­lands­banki birtir upp­gjör sitt fyrir annan árs­fjórðung 29. júlí. Sam­kvæmt af­komu­spá Akkurs er gert ráð fyrir að hreinar vaxta­tekjur bankans hafi numið 15,2 milljörðum króna á fjórðungnum, saman­borið við 13,9 milljarða á sama tíma í fyrra. Það jafn­gildir 9,4% aukningu milli ára. Vaxta­munur bankans er áætlaður 3,4%, saman­borið við 3,3% á öðrum fjórðungi í fyrra. Hreinar þóknana­tekjur eru hins vegar taldar dragast saman um 11% milli ára og nema 3,2 milljörðum króna, saman­borið við 3,6 milljarða á öðrum fjórðungi í fyrra. Heildar­rekstrar­tekjur bankans eru áætlaðar 18,6 milljarðar króna og hækka um tæp 5% milli ára. Akkur gerir ráð fyrir að rekstrar­kostnaður hafi numið 7,8 milljörðum króna á fjórðungnum og aukist um 7,1% frá fyrra ári. Þá er gert ráð fyrir 1,0 milljarði króna í virðis­rýrnun, saman­borið við 402 milljóna króna jákvæða virðis­rýrnunarfærslu á sama tíma í fyrra. Þessi breyting skýrir að stórum hluta hvers vegna hagnaðurinn dregst saman þrátt fyrir auknar rekstrar­tekjur. Hagnaður fyrir skatta er áætlaður 9,2 milljarðar króna, sem væri tæp­lega 11% lækkun milli ára. Arð­semi eigin fjár er áætluð 12,3%, saman­borið við 13% á öðrum fjórðungi í fyrra. Verðbólga styður vaxta­tekjur Í mati Akkurs kemur fram að verðbólga á öðrum árs­fjórðungi hafi numið um 1,5%, svipað og á sama tíma í fyrra, en sé lægri en á fyrsta fjórðungi þegar hún var um 2,5%. Það leiði til þess að hreinar vaxta­tekjur lækki frá fyrri fjórðungi en hækki engu að síður milli ára. Akkur áætlar vaxta­muninn 3,4%, sem er 10 punktum hærri en á sama tíma í fyrra en 50 punktum lægri en á fyrsta fjórðungi. Greiningar­fyrir­tækið bendir einnig á að skipu­lags­breytingar sem tóku gildi í apríl hafi áhrif á af­komuna. Gert er ráð fyrir að 260 milljóna króna starfs­loka­kostnaður falli til á öðrum fjórðungi. Á móti eigi breytingarnar að skila um einum milljarði króna í ár­legum sparnaði í launa­kostnaði, sem fari að koma fram frá þriðja fjórðungi og verði að fullu kominn fram árið 2027. Akkur segir virðis­rýrnun vera svipaða og á fyrsta fjórðungi en breytinguna mikla í saman­burði við sama tíma­bil í fyrra. Þá naut af­koman góðs af jákvæðri virðis­rýrnunarfærslu en nú er gert ráð fyrir neikvæðri færslu upp á rúman milljarð króna. Horft til eigin­fjár og arð­greiðslu­getu Akkur nefnir fimm at­riði sem fjár­festar ættu sér­stak­lega að fylgjast með í upp­gjörinu. Þar á meðal er þróun vaxta­munar, sundur­liðun þóknana­tekna, arð­semi eigin fjár, eigin­fjár­hlut­fall bankans og um­fram­eigið fé miðað við 17,5% mark­mið, auk þróunar eigna í stýringu hjá Ís­lands­sjóðum. Greiningar­fyrir­tækið spáir því að Ís­lands­banki skili 28,1 milljarðs króna hagnaði á árinu í heild, sem væri 11,3% aukning frá árinu 2025. Hreinar vaxta­tekjur eru áætlaðar 59,7 milljarðar króna á árinu og heildar­rekstrar­tekjur 74,4 milljarðar. Arð­semi eigin fjár er áætluð 12,9% á árinu. Akkur er með kaupráðgjöf á bréfum Ís­lands­banka. Verðmat greiningar­fyrir­tækisins hljóðar upp á 181 krónu á hlut, en síðasta loka­gengi fyrir birtingu spárinnar var 145 krónur. Það jafn­gildir 25% mun frá síðasta gengi.