Strandveiðar hafa farið ágætlega af stað en veður hefur þó sett strik í reikninginn, einkum norðan- og austanlands. Fyrsta vikan fór engu að síður heldur betur af stað en fyrsta vikan í fyrra. Kjartan Sveinsson, formaður Landssambands smábátaeigenda, er sannfærður um að bætt verði 2.700 tonnum við þann 10.650 tonna pott sem strandveiðibátum er ætlaður núna. Miðað við óbreytta stöðu myndi potturinn óbreyttur duga til veiða fram í miðjan júlí. 502 bátar hafa landað það sem af er. 819 bátar eru skráðir til veiðanna. Sumir eru að klára grásleppuveiðar og aðrir að undirbúa að hefja strandveiðar. Tímabundin jöfnunarheimild Fyrir Alþingi liggur frumvarp atvinnuveganefndar um tímabundna jöfnunarheimild til að styðja við strandveiðar. Í nefndaráliti kemur fram að heimilað verði að ráðstafa allt að 2.700 tonnum af óslægðum þorski til strandveiða til viðbótar við úthlutað aflamagn á fiskveiðiárinu. Heimildin er skilgreind sem tímabundin ráðstöfun meðan unnið er að nýju skipulagi á ráðstöfun 5,3% kerfisins. Kjartan bindur vonir við að á þessu kjörtímabili verði tryggðar veiðar í 48 daga eins og stefnt hefur verið að. Til þess að það geti orðið yrði að finna útfærslu sem dugi. „Við höfum áhyggjur af því að ráðgjöf Hafró fyrir nýtt fiskveiðiár verði ekki upp á marga fiska. Það gerir stöðuna erfiðari. En ráðgjöf Hafró byggir ekki á heilögum tölum eða heilögum vísindum. Kjartan Páll Sveinsson, formaður Landssambands smábátaeigenda. Ein af tillögum Landssambands smábátaeigenda felur í sér að stækka 5,3% kerfið upp í 8%. Útfærslan yrði sú að einungis 4% drægjust frá ráðgjöf Hafró og hin 4% yrðu höfð utan sviga. Frá okkar bæjardyrum séð er það eina vitið. Það þarf að vera miklu meira svigrúm til staðar fyrir strandveiðina. Það er hvort eð er farið fram úr ráðgjöfinni með rannsóknakvóta, undirmáli og öðru slíku. Röksemdafærsla okkar er sú að þessar umhverfisvænustu veiðar ættu að njóta sérkjara í stað þess að þær séu njörvaðar meira niður en aðrar veiðar,“ segir Kjartan.