Matvöruverð hefur hækkað meira á fyrstu þremur mánuðum ársins en í byrjun síðasta árs. Vörukarfa verðlagseftirlits ASÍ hækkaði um 0,68% milli febrúar og mars. Mánaðarhækkunin er þvert á vöruflokka. Mestu munar um unnar kjöt- og mjólkurvörur en aðrar dýraafurðir og sælgæti hækka einnig. Benedikt S. Benediktsson, framkvæmdastjóri Samtaka verslunar og þjónustu, segir mestu verðhækkanirnar hafa verið á erlendri vöru í nokkur ár, einkum í kjölfar stríðsins í Úkraínu. Verð á erlendri vöru hafi loks tekið að hjaðna en þá hafi ný hækkanahrina tekið við, í þetta sinn innanlands. „Ef maður myndi horfa á hvað væri effektívast eða hvað það er sem hefur mest áhrif á í raun og veru verðið þá er það auðvitað innkaupsverðið og þar liggur vandinn.“ Afkoma sé tiltölulega lítill hluti af matvöruverði Spurður hvort stöðugt hækkandi matvælaverð gefi ekki tilefni til þess að matvöruverslanir gefi eftir í arðsemiskröfu, kveðst Benedikt ekki geta fallist á það. „Ég er ekki viss um það. Ef við bara tækjum sem dæmi að dagvara myndi ákveða að sýna ekki neina jákvæða afkomu í einhver ár, þá er ég ekki viss um að neytendur yrðu varir við það því afkoman er tiltölulega lítill hluti af matvælaverðinu. “ Hann segir fleiri þurfa að koma að borðinu til þess að raunverulega lækka verð á matvöru, ekki síst framleiðendur. Hann viti um dæmi þar sem matvöruverslanir hafi fest verð á ákveðnum nauðsynjavörum. „En það vegur bara tiltölulega lítið, það þarf bara miklu stærra afl heldur en að bara dagvöruverslanirnar taki þetta á sig.“