Hluta­bréfa­verð Hampiðjunnar hefur lækkað um tæp 10% í fyrstu við­skiptum eftir neikvæða af­komu­viðvörun í gærkvöldi. Gengi Hampiðjunnar stendur í 102 krónum á hlut þegar þetta er skrifað eftir um 178 milljón króna við­skipti. Stærstu við­skipti dagsins áttu sér stað rétt fyrir tíu­leytið þegar 500 þúsund hlutir á genginu 106 krónur skiptumst um hendur. Jafn­gildir það um 53 milljón króna við­skiptum. Í af­komu­viðvörun Hampiðjunnar í gærkvöldi kom fram að af­koma fjórða árs­fjórðungs 2025 verði undir væntingum. Drög að upp­gjöri benda til að EBITDA árs­fjórðungsins verði 6–7 milljónir evra, saman­borið við 8,9 milljónir evra á sama tíma­bili árið áður, og að lítils háttar tap kunni að verða á árs­fjórðungnum. Þrátt fyrir þetta áætlar félagið að tekjur sam­stæðunnar hafi vaxið um­tals­vert á árinu. Sam­kvæmt drögum nemur velta ársins tæpum 360 milljónum evra, sem er um 15% aukning milli ára. EBITDA fyrir árið í heild er hins vegar áætluð 39–40 milljónir evra, eða rúm­lega 5% hækkun, sem er minni vöxtur en fyrri árs­hluta­upp­gjör hafi gefið til kynna. Hampiðjan gerir ráð fyrir að hagnaður ársins 2025 verði um 5,5–6 milljónir evra, saman­borið við 14 milljónir evra árið áður. Félagið bendir á að niður­staðan skýrist að veru­legu leyti af ein­skiptisliðum og tíma­bundnum ytri áhrifaþáttum, og að hún hafi ekki áhrif á langtímaáætlun. Í til­kynningu félagsins er tekið fram að sveiflur í gengis­mun og fjár­eigna­tekjum hafi haft tals­verð áhrif. Gengis­munur er sagður hafa sveiflast um tæpar 4 milljónir evra milli ára, úr því að vera jákvæður um 2 milljónir evra í það að verða neikvæður um 2 milljónir evra. Þá lækka fjár­eigna­tekjur milli ára úr um 4,6 milljónum evra í um 1,6 milljónir evra. Þar vegur þungt að inn­eign í ís­lenskum krónum hafi verið nýtt að hluta við kaup Hampiðjunnar á 75,1% hlut í Kohin­oor á Ind­landi í byrjun ársins. Sjá einnig Hampiðjan varar við slakari af­komu