Lífeyrisbyrði Birtu, fjórða stærsta lífeyrissjóðs landsins, fór í fyrra yfir 100% í fyrsta sinn. Með öðrum orðum greiddi sjóðurinn þar með út meiri lífeyri en sem nemur þeim iðgjöldum sem hann tók á móti. Ólafur Sigurðsson, framkvæmdastjóri Birtu lífeyrissjóðs, segir hækkandi lífeyri sem hlutfall af iðgjöldum vera eðlilega framvindu og þroskamerki fyrir sjóði sem hafa verið starfræktir í meira en 50 ár. Í auknum mæli séu árgangar að hefja lífeyristöku eftir að hafa greitt í 40 ár af fullum launum. Umræddur hópur eigi því ríkari rétt en sú kynslóð sem á undan var. Auk þess hafi lífslíkur verið að vaxa. „Sjóðfélagar eru einfaldlega að uppskera eftir áratuga sparnað og í mínum huga er það frábært,“ segir Ólafur í samtali við Viðskiptablaðið. „Það er sérlega ánægjulegt að sjá þessa sjóðasöfnun virka eftir allt það sem á undan er gengið frá því að kjarasamningurinn 1969 var undirritaður.“ Aðspurður segist hann ekki gera ráð fyrir að hækkandi lífeyrisbyrði muni hafa teljandi áhrif á fjárfestingarstefnu Birtu á næstu árum. Hann bendir þannig á að áætlað er að greiðsluflæði sjóðsins verði jákvætt fram til ársins 2044 og bætir við að þessir útreikningar gera ekki ráð fyrir nýliðun. Það helgist af því að vaxtatekjur séu enn nokkuð sterkar. Í fjárfestingarstefnu Birtu fyrir árið 2026 kemur fram að uppsöfnuð fjárfestingaþörf á næstu fimm árum sé áætluð um 102 milljarðar króna umfram útgreiðslur, eða að meðaltali um 20,4 milljarðar á ári. Yfir 100 milljarða skattspor Ólafur segir að í ákveðnum skilningi sé ekki rétt að tala um „lífeyrisbyrði“ í þessu samhengi, m.a. í ljósi þess að skattspor lífeyrisþega í heild sé að verða mjög stórt. „Þeir sem eru að koma á lífeyri núna eru sýrurokkarar frá sjöunda áratug síðustu aldar og hafa sannarlega lagt sitt af mörkum til uppbyggingar á þessu kerfi.“ Út úr samtryggingu og séreign lífeyriskerfisins voru greiddir um 343 milljarðar króna á síðasta ári. Sé miðað við lægsta skattþrep til einföldunar, má ætla að tekjuskattur af lífeyri hafi numið 108 milljörðum króna í fyrra. Fréttin er hluti af lengri umfjöllun í Viðskiptablaði vikunnar. Áskrifendur geta nálgast greinina í heild sinni hér og annað efni úr blaðinu hér .