Seðlabankar keyptu mun minna af gulli á fyrsta ársfjórðungi en áður var talið, sem bendir til þess að einn helsti drifkraftur eftirspurnar eftir gulli kunni að vera að veikjast. Endurskoðun gagna sýndi áætluð gullkaup seðlabanka á tímabilinu lækka úr 244 tonnum í 57 tonn, sem er minnsta magn á fyrsta ársfjórðungi í meira en 15 ár. Þetta hefur Financial Times eftir World Gold Council, samtökum gulliðnaðarins. Kaup seðlabanka hafa verið stór þáttur í gullmarkaðnum síðustu fjögur árin og stutt metverðhækkun sem náði hámarki fyrr á árinu. Erfitt hefur þó orðið að mæla kaup þeirra, þar sem þau eru sífellt ógagnsærri, sérstaklega hjá stórum kaupendum á borð við Kína, sem birtir aðeins hluta upplýsinga um sín kaup. Sumir seðlabankar gefa Alþjóðagjaldeyrissjóðnum upplýsingar um gullforða sinn af fúsum og frjálsum vilja en engin skylda er til þess. John Reade, markaðssérfræðingur hjá WGC, sagði skekkju í gögnum geta komið upp. Hann nefnir að opinberar upplýsingagjafir hafi versnað frá 2022 þegar refsiaðgerðir Bandaríkjanna gegn Rússlandi ýttu undir að mörg þróunarríki drægju úr vægi dollarsins í forða sínum og birtu minna um gullkaup. Samdráttur í kaupum seðlabanka gæti þrýst gullverði niður, en það hefur þegar lækkað um nær 30% frá hámarkinu í janúar. Seðlabankar eru oft taldir mynda óformlegt verðgólf fyrir gullmarkaðinn og stóðu undir nær þriðjungi eftirspurnar á öðrum ársfjórðungi, samkvæmt WGC. Á fyrri helmingi ársins keyptu seðlabankar og aðrar opinberar stofnanir, þar á meðal þjóðarsjóðir, um 345 tonn af gulli, minnsta magn á sex mánaða tímabili frá 2022. Hluti gullsins sem áður var talinn hafa farið til opinberra kaupenda var endurflokkaður sem viðskipti utan kauphalla og annað.