Gullverð féll undir 4.000 dali á únsu í dag og stefnir nú í sinn versta ársfjórðung í meira en áratug, eftir að væntingar um hærri vexti í Bandaríkjunum og minni áhugi smáfjárfesta hafa sett mark sitt á markaðinn. Frá þessu greinir Financial Times. Verð á gulli fór um tíma niður fyrir 3.943 dali á únsu, sem er lægsta staða þess frá því í nóvember, áður en það hækkaði lítillega á ný. Á síðustu þremur mánuðum hefur verðmæti málmsins lækkað um tæplega 14%. Þróunin markar viðsnúning frá því í byrjun árs, þegar gullverð rauk upp í tæplega 5.595 dali á únsu og náði sögulegu hámarki. Sú hækkun var að miklu leyti drifin áfram af kaupum smáfjárfesta. Greinendur telja að harðari tónn nýs seðlabankastjóra Bandaríkjanna hafi breytt viðhorfum markaðarins. Vaxandi væntingar um frekari vaxtahækkanir á þessu ári hafa dregið úr aðdráttarafli gulls, sem ber enga ávöxtun og stendur því verr að vígi þegar vextir hækka. Eftir nær samfellda hækkun undanfarin tvö ár hefur gullmarkaðurinn verið sveiflukenndur á þessu ári. Átök í Miðausturlöndum hafa ýtt undir hækkun olíuverðs og aukið verðbólguvæntingar, sem aftur hafa styrkt væntingar um hærri stýrivexti. Samhliða þessu hafa sumir fjárfestar fært fé sitt úr gulli yfir í hlutabréf ört vaxandi tæknifyrirtækja, einkum á sviði gervigreindar, auk annarra fjárfestingakosta sem hafa vakið mikla athygli á mörkuðum. Þá hafa útflæði úr gulltengdum kauphallarsjóðum aukist á undanförnum vikum, á sama tíma og kínverskir bankar hafa hert reglur um viðskipti almennra fjárfesta með eðalmálma. Samkvæmt gögnum Alþjóðagullráðsins stefnir júnímánuður í að verða annar mánuðurinn í röð þar sem nettóútflæði mælist úr slíkum sjóðum. Þrátt fyrir verðlækkunina telja sérfræðingar að áframhaldandi kaup seðlabanka á gulli geti stuðlað að því að verðið njóti ákveðins stuðnings til lengri tíma litið.