Fast­eigna­mat sem endur­speglar ekki lengur raun­veru­lega stöðu á markaði getur hægt á fast­eigna­við­skiptum og gert selj­endum erfiðara fyrir að lækka ásett verð. Þetta segir Böðvar Sigur­björns­son, lög­fræðingur og lög­giltur fast­eigna­sali, í sam­tali við Við­skipta­blaðið. Hann segir fast­eigna­mat ekki aðeins skipta máli sem skatt­stofn og viðmið fyrir lána­stofnanir heldur hefur það einnig huglæg áhrif á al­menning. „Þetta er í augum margra opinber verðstimpill,“ segir Böðvar. Út­tekt Við­skipta­blaðsins á kaupskrá Húsnæðis- og mann­virkja­stofnunar bendir til þess að þriðjungur full­búinna íbúða í fjöl­býli á höfuð­borgar­svæðinu hafi selst undir fast­eigna­mati á öðrum árs­fjórðungi. Hlut­fallið var 33,4%, saman­borið við 30,6% á fyrsta fjórðungi. Í júní einum fór hlut­fallið í 36,2%. Í Reykja­vík seldust tæp­lega fjórar af hverjum tíu full­búnum fjöl­býlisíbúðum undir fast­eigna­mati í júní. Svo hátt hlut­fall hefur ekki sést frá árunum eftir banka­hrunið. Böðvar segir að þegar markaðurinn kólnar geti fast­eigna­mat, sem byggir að hluta á eldri markaðs­upp­lýsingum, farið að vinna gegn eðli­legri verð­myndun. Selj­endur horfi þá til opin­bers mats sem gefi til kynna hærra verð, á sama tíma og raun­veru­leg eftir­spurn kalli á lægra ásett verð. Sjá einnig Fast­eigna­matið úr takti við markaðinn „Fólki finnst hart þegar markaðurinn er kominn undir það sem er opinber verðstimpill. Þar kemur þetta inn sem tregða í markaðinn,“ segir Böðvar. Hann segir fólk eðli­lega taka mið af fast­eigna­matinu þegar það verð­leggi eigin eign. Það birtist eig­endum meðal annars í gegnum fast­eigna­gjöld og sé því ekki aðeins tækni­legt mat inni í kerfi HMS. „Fólk vill ekki selja undir því sem HMS segir að eignin sé virði.“ Áskrifendur geta lesið ítarlega umfjöllun Viðskiptablaðsins um fasteignamarkaðinn hér.