Akkur spáir því að hagnaður Festar hafi dregist saman um rúm 10% á öðrum árs­fjórðungi. Sala eykst lítil­lega en tíma­bundin lokun Krónunnar í Lindum vegna endur­bóta, sveiflur á elds­neytis­markaði og auknar af­skriftir vega á móti. Akkur spáir því að Festi hafi hagnast um 1,3 milljarða króna á öðrum árs­fjórðungi. Það væri 10,5% minni hagnaður en á sama tíma í fyrra, þegar félagið hagnaðist um 1,4 milljarða króna. Festi birtir upp­gjör sitt fyrir annan árs­fjórðung 28. júlí. Sam­kvæmt af­komu­spá Akkurs námu tekjur Festar 44,7 milljörðum króna á fjórðungnum og jukust um 2,6% frá sama tíma í fyrra. Fram­legð er áætluð 11,3 milljarðar króna og hækkar um 2,7% milli ára. Fram­legðar­hlut­fallið stendur nánast óbreytt í 25,3%. Þrátt fyrir aukna sölu gerir Akkur ráð fyrir að rekstrar­hagnaður fyrir af­skriftir, eða EBITDA, hafi lækkað um 2,6% milli ára og numið 3,8 milljörðum króna. EBITDA-fram­legð er áætluð 8,6%, saman­borið við 9,0% á öðrum fjórðungi í fyrra. Akkur segir helstu skýringuna vera tíma­bundna lokun Krónunnar í Lindum, stærstu verslunar keðjunnar, sem var lokuð stærstan hluta fjórðungsins vegna endur­bóta. Verslunin hefur nú verið opnuð á ný. Í greiningunni er gert ráð fyrir að tekju­vöxtur í dag­vöru hafi verið lítill á fjórðungnum. Þar vegi saman hægari vöxtur korta­veltu í smásölu og tíma­bundin lokun Krónunnar í Lindum. Akkur bendir jafn­framt á að tekjur og fram­legð af elds­neyti séu áfram mikilvægur sveiflu­valdur í af­komu Festar. Olíu­verð hefur verið sveiflu­kennt og breytingar á sköttum geta haft áhrif á af­komu elds­neytis- og raf­orku­hluta sam­stæðunnar. EBIT, eða rekstrar­hagnaður eftir af­skriftir, er áætlaður 2,3 milljarðar króna og lækkar um 5,9% milli ára. EBIT-fram­legð er áætluð 5,2%, saman­borið við 5,7% á öðrum árs­fjórðungi í fyrra. Akkur segir hærri af­skriftir skýra að hluta hvers vegna EBIT lækkar meira en EBITDA. Hagnaðar­hlut­fall Festar er áætlað 2,8%, saman­borið við 3,3% á sama tíma í fyrra. Þótt tekjur aukist lítil­lega skilar það sér því ekki í auknum hagnaði á fjórðungnum. Akkur leggur þó áherslu á að annar árs­fjórðungur gefi ekki endi­lega heildar­mynd af árinu. Greiningar­fyrir­tækið spáir því að EBITDA Festar aukist um 4,3% á árinu 2026 í heild og nemi 16,7 milljörðum króna, þrátt fyrir væntan­legan sam­drátt á öðrum fjórðungi. Tekjur ársins eru áætlaðar 176,6 milljarðar króna, sem væri 1,8% aukning frá árinu 2025. Fram­legð er áætluð 45,7 milljarðar króna og hækkar um 4,7%. Fram­legðar­hlut­fallið er áætlað 25,9% á árinu, saman­borið við 25,2% í fyrra. Akkur spáir því að Festi hagnist um 6,2 milljarða króna á árinu í heild, sem væri lítil­lega minna en í fyrra. Sam­drátturinn er áætlaður 1,1%. Í greiningunni eru nefnd fimm at­riði sem fjár­festar ættu sér­stak­lega að fylgjast með í upp­gjörinu. Þar er fyrst horft til tekju­vaxtar, bæði vegna hægari korta­veltu í smásölu og vegna þess að Krónan í Lindum var lokuð tíma­bundið vegna endur­bóta stærstan hluta fjórðungsins. Þá verður horft til þróunar fram­legðar og áhrifa af breyttri sam­setningu tekna. Meta Festi um 65% yfir markaðsvirði Einnig verður fylgst með elds­neytis- og raf­orku­hluta Festar, þar sem sveiflur á elds­neytis­markaði og skatta­breytingar geta haft veru­leg áhrif. Þá nefnir Akkur þróun fram­legðar í lyf­seðils­skyldum lyfjum og lausasölu­lyfjum hjá Lyfju, auk þess hvort félagið breyti af­komu­horfum sínum fyrir árið. Akkur er með kaupráðgjöf á hluta­bréfum Festar. Verðmat greiningar­fyrir­tækisins er 516 krónur á hlut, en síðasta loka­gengi fyrir birtingu spárinnar var 313 krónur. Munurinn nemur 65%