Rus­sell 2000-vísi­talan stefnir í sitt besta ár frá 2003. Fjár­festar leita í auknum mæli í félög utan hóps stærstu tæknirisanna, meðal annars vegna upp­byggingar í kringum gervi­greind, hagstæðari skatta­reglna og lægra verðmats. Minni og meðal­stór skráð félög í Bandaríkjunum hafa hækkað kröftug­lega á árinu eftir að hafa lengi setið eftir á hluta­bréfa­markaði. Rus­sell 2000-vísi­talan, sem mælir gengi minni bandarískra félaga, hefur hækkað um 20% það sem af er ári og stefnir í sitt besta ár frá 2003. Til saman­burðar hefur S&P 500-vísi­talan hækkað um 10% og hluta­bréf stóru tæknirisanna sjö, svo­kallaðra Magnificent Se­ven-félaga, um innan við 3%. Þróunin markar nokkur þátta­skil á bandarískum hluta­bréfa­markaði. Undan­farin ár hafa stærstu tækni­fyrir­tækin borið megnið af hækkunum markaðarins. Nú leita fjár­festar í auknum mæli í félög utan þess þrönga hóps, ekki síst fyrir­tæki sem eru lægra metin en geta notið góðs af sömu fjár­festingar­bylgju í gervi­greind og hefur drifið tæknirisana áfram. Kriti Gupta, alþjóð­legur fjár­festingaráðgjafi hjá JP­Morgan Private Bank, segir að fjár­festar hafi árum saman beðið eftir því að hækkun hluta­bréfa­markaðarins næði til fleiri félaga. „Fjár­festar þurfa ekki lengur að reiða sig á örfáa sigur­vegara,“ segir Gupta. Man­ish Kabra, yfir­maður hluta­bréfa­stefnu í Bandaríkjunum hjá Société Généra­le, segir mikla upp­byggingu inn­viða fyrir gervi­greind vera eina helstu skýringuna á hækkunum minni og meðal­stórra félaga. Fjár­festingar í gagna­verum, raf­orku­inn­viðum og hálf­leiðara­tengdri starf­semi renni nú í auknum mæli til fyrir­tækja neðar í virðiskeðjunni. Stóru bandarísku tækni­fyrir­tækin Amazon, Meta, Micros­oft og Alp­habet gera ráð fyrir að verja sam­tals um 725 milljörðum dala til inn­viða tengdra gervi­greind á þessu ári. Það er 77% aukning frá fyrra ári. Áhrifin sjást ekki aðeins hjá tækni­risunum sjálfum heldur einnig hjá birgjum og þjónustu­fyrir­tækjum sem tengjast upp­byggingunni. Ichor Holdings og Ultra Clean Holdings, sem selja búnað og íhluti fyrir framleiðendur örgjörva hafa bæði meira en fjór­faldast í verði það sem af er ári. Rack­space Technology, sem veitir skýjaþjónustu og að­stoðar fyrir­tæki við að keyra gervi­greindar­lausnir, hefur hækkað um 450%. Fleiri minni og meðal­stór félög sem tengjast fjar­skiptum, inn­viðum, hálf­leiðurum og líftækni hafa einnig hækkað veru­lega. Þar á meðal eru MaxLinear, Bandwid­th, Anterix, Eras­ca og ImmunityBio. Fjár­festar benda jafn­framt á að mörg minni félög séu enn metin mun lægra en stærstu félögin á markaði. Dane Smith, yfir­maður fjár­festinga­stefnu og greiningar fyrir Norður-Ameríku hjá Sta­te Street Invest­ment Mana­gement, segir að minni bandarísk félög njóti nú bæði góðs af sterkum efna­hag og hagstæðara verðmati. Hann segir að hátt verðmat stærstu félaganna og mikil samþjöppun á markaði hafi valdið fjár­festum vaxandi áhyggjum. Minni félög hafi því orðið áhuga­verður kostur fyrir fjár­festa sem vilji dreifa áhættunni betur. Myndin er þó ekki einhlít. Russell 2000-vísitalan er í heild metin á um 29-faldan hagnað, eða með V/H-hlutfall upp á 29, samkvæmt gögnum Bloomberg. Til samanburðar er S&P 500-vísitalan metin á um 20-faldan hagnað. Samanburðurinn er þó ekki alveg hreinn, þar sem mörg vaxtarfélög í Russell 2000 skila litlum hagnaði eða tapi og hækka þannig V/H-hlutfall vísitölunnar. S&P 600-vísitalan, sem inniheldur færri félög í taprekstri, er hins vegar metin á um 16-faldan væntan hagnað. Skatta­breytingar hafa einnig stutt við minni og meðal­stór félög. Í frétt Financial Times er bent á að skattalækkanir og hagstæðari af­skrifta­reglur hafi styrkt stöðu smærri fyrir­tækja, á sama tíma og skatt­endur­greiðslur hafi stutt við bandaríska neyt­endur. Kabra segir að skatta­breytingarnar hafi hjálpað bandaríska hag­kerfinu að standa af sér hækkun orku­verðs í kjölfar átaka fyrir botni Persaflóa. „Án laganna hefðum við ekki séð tveggja stafa hækkun í öllum geirum minni félaga,“ segir Kabra. Ekki eru þó allir sann­færðir um að hækkunin sé merki um heil­brigðari og breiðari hluta­bréfa­markað. Max Kettner, yfir­maður eigna­dreifingar hjá HSBC, segir að hækkun Rus­sell 2000 hafi að stórum hluta verið drifin áfram af félögum sem enn skila ekki hagnaði. „Þetta eru tækni­við­skiptin á sterum,“ segir Kettner. Að hans mati endur­speglar hækkunin ekki fyrst og fremst styrk raun­hag­kerfisins heldur aukna áhættusækni fjár­festa sem séu til­búnir að greiða hátt verð fyrir félög sem lofa framtíðar­hagnaði. Rus­sell Micro­cap-vísi­talan, þar sem meira en helmingur félaganna hefur verið taprekinn árum saman, hefur hækkað enn meira en Rus­sell 2000, eða um 25% það sem af er ári. Dan Hanbury, sjóð­stjóri hjá Ni­ne­ty One, segir að margir vilji trúa því að hækkun markaðarins sé loksins að ná til fleiri félaga en stærstu tækni­fyrir­tækjanna. Raunin sé þó flóknari. „Markaðirnir í heild hafa verið sterkir og mörg tap­rekstrarfélög hafa leitt hækkunina,“ segir Hanbury. Þótt minni og meðal­stór félög hafi því loks náð vopnum sínum á Wall Street er enn deilt um hvort hækkunin sé upp­hafið að breiðari og heil­brigðari markaði eða enn ein birtingar­mynd áhættusækni fjár­festa í skugga gervi­greindaræðisins.