Norska ráðgjafafyrirtækið Det Norske Veritas, DNV, vann greininguna fyrir Samtök atvinnulífsins og Samtök verslunar og þjónustu. Samkvæmt henni var ETS-kostnaður við siglingar milli Reykjavíkur og Rotterdam að minnsta kosti 50% hærri og í sumum tilvikum meira en tvöfalt hærri en sambærileg skip sem sigla innan Evrópu. Ástæðurnar eru meðal annars landfræðileg lega Íslands, lengri siglingaleiðir og krefjandi veðurskilyrði og sjólag á Norður-Atlantshafi, auk þess sem skip þurfa að sigla hraðar til að halda áætlunum, sem eykur eldsneytisnotkun og losun. DNV hafði áður unnið greiningu að beiðni innviðaráðuneytis og umhverfis-, orku- og loftslagsráðuneytis um áhrif veðurs og ölduhæðar á orkunotkun skipaflutninga á alþjóðlegum siglingaleiðum. Niðurstöður þeirrar greiningar bentu til þess að skip sem sigla við aðstæður á Norður-Atlantshafi þurfi að jafnaði að nota 22,4% meiri orku vegna ölduhæðar og vinda en þau myndu þurfa á lygnum sjó (e. calm water conditions). Til samanburðar var samsvarandi viðbótarorkuþörf vegna veðuraðstæðna metin að meðaltali 8% á siglingaleiðum innan Evrópu, einnig miðað við lygnan sjó. Fyrir leiðina Reykjavík–Rotterdam var viðbótarorkuþörfin vegna vinds og öldu metin um 17%. Þegar litið var til reksturs sambærilegra flutningaskipa yfir heilt ár reyndist veðurtengd viðbótarorkuþörf skipa sem sigla til Íslands að jafnaði um 9% hærri en hjá sambærilegum skipum sem sigla innan Evrópu. Hagsmunir atvinnulífsins og almennings undir Benedikt S. Benediktsson, framkvæmdastjóri Samtaka verslunar og þjónustu, og Bjarni Benediktsson, framkvæmdastjóri Samtaka atvinnulífsins, segja greiningarnar sýna svart á hvítu að staðan sé ekki jöfn, en flest önnur Evrópuríki búi við styttri siglingaleiðir, hagstæðari rekstrarskilyrði og fleiri flutningskosti. „Það sem kom helst á óvart var ef til vill ekki niðurstaðan sjálf. Íslendingar hafa frá öndverðu vitað af aðstæðum á okkar hafsvæðum og hversu landfræðilega fjarlæg við erum. Hins vegar er það hversu skýrt gögnin staðfesta umfang þessa munar sem vekur athygli og þá að sama skapi hvernig kerfið leggst hlutfallslega mun þyngra á íslenskt atvinnulíf samanborið við atvinnulíf í öðrum hagkerfum sem búa við ETS- kerfið,“ segir Bjarni. Benedikt segir greiningarnar veita óháða staðfestingu á því sem flutningageirinn hafi lengi talið um áhrif veðurs, öldufars og siglingafjarlægðar á kostnað íslenskra sjóflutninga. Ísland búi við allt aðra stöðu en önnur Evrópuríki, þar sem 99% vöruflutninga til og frá landinu fara fram sjóleiðis, samanborið við um 70% að jafnaði í Evrópu. Málið snúist ekki eingöngu um skipafélög heldur um áhrif á allt atvinnulífið og almenning, þar sem aukin gjaldheimta skili sér á endanum út í verðlag. „Við höfum ekki verið að nálgast málið þannig að við beinlínis leggjumst gegn ETS kerfinu sem slíku, heldur höfum við fyrst og fremst verið að gæta hagsmuna bæði íslenskra fyrirtækja og almennings með því að stuðla að því að kerfið sé þannig uppbyggt að leikvöllurinn sé jafn,“ segir Benedikt. Nánar er fjallað um málið í Viðskiptablaðinu . Áskrifendur geta lesið fréttina í heild hér .