Samtök atvinnulífsins, Samtök verslunar og þjónustu og Samtök ferðaþjónustunnar, ásamt Eimskip og Icelandair, funduðu með fulltrúum framkvæmdastjórnar ESB í mars síðastliðnum vegna fyrirhugaðrar endurskoðunar á ETS-kerfinu, viðskiptakerfi ESB með losunarheimildir, sem kynnt verður þann 15. júlí. Á fundunum var bent á sérstöðu Íslands þegar kemur að sjóflutningum, bæði vegna siglingafjarlægðar og veðurs og öldufars. „Við fengum í raun staðfestingu á því að þetta væri eitthvað sem framkvæmdastjórninni þætti fróðlegt að heyra meira um. Við upplifðum það þannig að hún væri jákvæð fyrir því að skoða að gera breytingar á kerfinu þannig að betur væri tekið tillit til okkar hagsmuna,“ segir Benedikt S. Benediktsson, framkvæmdastjóri Samtaka verslunar og þjónustu. Í kjölfarið óskaði framkvæmdastjórnin eftir frekari gögnum. Norska ráðgjafafyrirtækið Det Norske Veritas, DNV, hefur unnið tvær greiningar sem sýna fram á sérstöðu Íslands. Fyrri greininginn var unnin fyrir íslensk stjórnvöld og fjallaði um áhrif veðurs og ölduhæðar á orkunotkun skipaflutninga. Niðurstöður þeirrar greiningar bentu til þess að skip sem sigla við aðstæður á Norður-Atlantshafi þurfi meiri orku vegna ölduhæðar og vinda en skip sem sigla innan Evrópu. Seinni greiningin var unnin fyrir Samtök atvinnulífsins og Samtök verslunar og þjónustu um kostnað vegna ETS-kerfisins. Samkvæmt þeirri greiningu bera flutningaskip sem sigla til og frá Íslandi umtalsvert meiri kostnað vegna ETS-kerfisins en sambærileg skip sem sigla innan Evrópu. Bjarni Benediktsson, framkvæmdastjóri Samtaka atvinnulífsins segir greiningar DNV sýna fram á með skýrum og gagnadrifnum hætti hvaða áhrif landfræðileg sérstaða Íslands hefur á kostnað og samkeppnisstöðu fyrirtækja og hvers vegna mikilvægt er að tekið sé mið af þeim áhrifum við endurskoðun kerfisins. Gögnin breyti forsendum umræðunnar og gefi þeim mun sterkari grunn til að fylgja málinu áfram gagnvart Evrópusambandinu. „Við teljum mikilvægt að ETS-kerfið verði metið út frá því hvort það nái markmiðum sínum án þess að raska jafnræði á samkeppnisgrundvelli. Markmið markaðsdrifinna loftslagsreglna á borð við ETS hlýtur að vera að draga úr losun án þess að fyrirtæki í einstökum ríkjum beri þyngri byrðar vegna aðstæðna sem þau hafa enga raunhæfa möguleika á að breyta. Við erum því ekki að biðja um sérmeðferð heldur jafnar byrðar,“ segir Bjarni. Hvað íslensk stjórnvöld varðar hafi þau sýnt vilja í verki með því að fjármagna fyrri DNV-greininguna og koma henni á framfæri við framkvæmdastjórn ESB. „Við væntum þess að stjórnvöld muni halda uppteknum hætti hvað varðar seinni DNV greininguna og komi henni á framfæri við hlutaðeigandi aðila í Brussel. Við teljum afar mikilvægt að íslensk stjórnvöld haldi áfram að fylgja málinu eftir gagnvart Evrópusambandinu,“ segir Bjarni. Nánar er fjallað um málið í Viðskiptablaðinu . Áskrifendur geta lesið fréttina í heild hér .