Sjóðurinn Stefnir – Arðgreiðslusjóður, sem eins og nafnið gefur til kynna er í rekstri Stefnis, var með hæstu ávöxtun allra hlutabréfasjóða á árinu 2025. Skilaði hann sjóðsfélögum sínum rúmlega 5% ávöxtun. Stærstu eignir sjóðsins í lok apríl sl. voru í Eik fasteignafélagi, Arion banka og Íslandsbanka. Var fjárfesting sjóðsins í þeim félögum um 31 prósent af eignum hans á þeim tíma. Stefnir er sjóðstýringarfyrirtæki sem var stofnað árið 1996. Félagið, sem er í eigu Arion banka, var með um 379 milljarða króna í virkri sjóðastýringu í lok síðasta árs. Jón Finnbogason er framkvæmdastjóri Stefnis en hjá félaginu starfa 20 sérfræðingar í þremur teymum við stýringu á fjölbreyttu úrvali verðbréfa- og sérhæfðra sjóða fyrir almenna fjárfesta. Heilt yfir var síðasta ár langt því frá gjöfult fyrir hlutabréfasjóði. Til marks um það voru aðrir hlutabréfasjóðir sem opnir eru almennum fjárfestum með ávöxtun á bilinu 1,01 til -22,57 prósent á síðasta ári. Þetta er neikvæður viðsnúningur frá árinu 2024 þegar allir sjóðirnir nema einn, Akta Stokkur í rekstri Akta sjóða, skiluðu jákvæðri ávöxtun. Til marks um það var sá hlutabréfasjóður sem skilaði mestri ávöxtun árið 2024, Sjóðurinn ÍV hlutabréf í rekstri Íslenskra verðbréfa (áður SIV hlutabréf í rekstri SIV eignastýringar), með tæplega 24 prósent ávöxtun. Aðrir hlutabréfasjóðir sem opnir eru almennum fjárfestum voru árið 2024 með ávöxtun á bilinu 10 til 23 prósent, að undanskildum sjóðnum Akta Stokkur, sem skilaði neikvæðri ávöxtun upp á 21,74%. Árið 2024 skiluðu þannig allir sjóðirnir nema einn ávöxtun sem var umfram ársverðbólgu. Segja má að ávöxtun hlutabréfasjóða á síðasta ári hafi ekki verið í ósvipuðum takti og árin 2023 og 2022. Árið 2023 skilaði arðgreiðslusjóður Stefnis mestri ávöxtun með rúmlega þriggja prósenta ávöxtun. Þá voru einungis sjö hlutabréfasjóðir í heildina, í flokki íslenskra hlutabréfa, sem skiluðu jákvæðri ávöxtun á árinu 2023, þar af fimm þeirra undir 1% og allir undir ársverðbólgu. Árið 2022 reyndist enn erfiðara fyrir hlutabréfasjóði þar sem enginn þeirra skilaði jákvæðri ávöxtun. Var hún að meðaltali neikvæð um 12,23%. Árin áður, 2021 og 2020, voru aftur á móti gjöful á hlutabréfamarkaði, þar sem sjóðirnir skiluðu að meðaltali 45% ávöxtun árið 2021 og 28% árið áður. Krefjandi aðstæður heima og erlendis Eins og gefur að skilja réðst slæmt gengi hlutabréfasjóða á síðasa ári af því að heilt yfir var árið þungt á íslenskum hlutabréfamarkaði. Innlendur hlutabréfamarkaður átti sterkan endasprett árið 2024 og var líflegur í upphafi síðasta árs. Markaðurinn tók aftur á móti dýfu er blikur voru á lofti alþjóðlegum fjármálamörkuðum vegna tollabrölts Donald Trump Bandaríkjaforseta. Í kjölfar kynningar forsetans á umfangsmiklum tollaaðgerðum í byrjun apríl í fyrra tóku hlutabréfamarkaðir víða um heim snarpa dýfu. Þó að framkvæmd tollana hafi síðar verið frestað tókst íslenska markaðnum ekki að ná sambærilegri viðspyrnu og erlendir markaðir náðu margir hverjir. Þar hafði afleit verðbólgumæling í apríl og væntingar um sölu ríkisins á hlut sínum í Íslandsbanka, sem varð til þess að margir fjárfestar biðu rólegir á hliðarlínunni, þó nokkur áhrif á gang mála. Þrálát verðbólga leiddi að sama skapi til þess að vaxtalækkanir urðu minni en markaðsaðilar höfðu væntingar til í upphafi árs. Sú þróun dró úr áhuga fjárfesta á hlutabréfum og leiddi til þess að flæði fjármagns í óbundna innlánsreikninga með háum vöxtum jókst. Áföll í útflutningsgreinum og óvissa á fasteigna- og lánamarkaði í kjölfar vaxtadómsins svokallaða var svo síður en svo til þess fallin að blása fjárfestum bjartsýni í brjóst. Seint á síðasta ári bættist svo ofan á allt við neikvæðar fréttir frá Alvotech. Matvæla- og lyfjaeftirlit Bandaríkjanna (FDA) gerði athugasemdir við framleiðsluferli á einni af líftæknihliðstæðu félagsins. Félagið brást við með því að lækka afkomuspá sína fyrir árið 2025 í heild umtalsvert sem leiddi svo til snarprar lækkunar á gengi hlutabréfa félagsins. Nánar er fjallað um málið í veglegu tímariti Frjálsrar verslunar , áskrifendur geta lesið greina hér . Hægt er að kaupa ritið hér .