Mánudaginn 8. júní fór umsjónarmaður Víðsvegar á Rás 1 á flakk um Hrísey og spjallaði við fólk á förnum vegi. Gerir upp gamla ættaróðalið Aron Trausti Sigurbjörnsson var mikið í Hrísey sem barn og þykir afar vænt um ættaróðalið Selaklöpp, hús sem stendur á klöpp fyrir ofan höfnina. Fyrir nokkrum árum spurði hann ömmu sína hvað hún ætlaði að gera við húsið. „Hún sagði þú getur fengið það , og svo kom ég hingað. Og það fylgdi sölunni að ég ætti að drena, sem er eiginlega það sem ég æltaði að gera upprunalega. Síðan þá er búið að gera ýmislegt meira.“ Björgvin L. Pálsson er einn þeirra sem aðstoðar Aron við að gera upp Selaklöpp. Hann er lærður húsasmiður og er enn að sinna fjölbreyttum smíðaverkefnum. Hann lætur aldurinn ekki stoppa sig. „Ég er náttúrlega ekkert unglamb lengur, 96 ára.“ Björgvin nýtur þess að vinna í Selaklöpp. „Já, það er skemmtilegt að gera upp gömul hús. Þetta var orðið mjög illa farið.“ Hrísey í Eyjafirði er önnur stærsta eyjan við Ísland og er hluti af Akureyrarbæ. Við upphaf árs 2026 bjuggu 156 í eynni samkvæmt tölum Hagstofu Íslands. Var alltaf hörð á því að koma ekki aftur Dröfn Teitsdóttir ólst upp í Hrísey og fluttist aftur heim fyrir um einu og hálfu ári, meðal annars til að koma dætrum sínum í rólegra skólaumhverfi. Fjölskyldan bjó í Reykjavík, þar leið þeim vel og Dröfn segist alltaf hafa verið hörð á því að fara ekki til baka. En svo kom draumahúsið í Hrísey á sölu auk þess sem þeim hjónum fannst skólaumhverfið í Reykjavík ekki henta dætrum þeirra. Dröfn starfar hjá Origo í fjarvinnu og sinnir starfinu í Fjarbúðinni – fjarvinnslusetri í Hrísey. Hún segir gott að hafa ákveðinn stað til að mæta til vinnu á morgnanna. „Maður fær svona vinnustaðafíling á að vera hérna, þó það séu bara hundrað skref heim og til baka, þá er mjög gott að koma í vinnuna og fara úr vinnunni og hafa smá félagsskap hérna í leiðinni,“ segir hún. Ýmsar áskoranir en samheldni íbúanna einn stærsti kosturinn Ásrún Ýr Gestsdóttir er þjónustu- og upplýsingafulltrúi hjá Akureyrarbæ, starfsmaður Hverfisráðs Hríseyjar auk þess að vera með fingurna í bæjarpólitíkinni. Hún segir kostina við að búa í litlu samfélaginu eins og í Hrísey vera að íbúarnir eru eins og stórfjölskylda. „Og eins og í stórri fjölskyldu þá getur þú treyst á fólkið þegar á reynir. Þýðir ekki að þið séuð alltaf sammála og stundum færðu nóg af hinum aðilanum, en það er alltaf þessi væntumþykja og samheldni.“ Það fylgi því líka ýmsar áskoranir að búa í Hrísey, til dæmis hár flutningskostnaður, breytingar á tíðni ferða hjá Hríseyjarferjunni og vera alltaf litli aðilinn á móti þeim stærri. „Upplifum stundum að við þurfum alltaf að vera í báráttu fyrir grundvallaratriðum sem samfélag þarf til að fúnkera. Það getur verið pínu þreytandi en á sama tíma erum við mörg, þó sumum finnist við fá, en þá erum við mörg og erum þá að heyja þessa baráttu saman.“ Náttúran og hæglætið einkennir ferðaþjónustuna Linda María Ásgeirsdóttir er einn eigenda veitingastaðarins Verbúðin 66 auk þess að vera formaður og starfsmaður Ferðamálafélags Hríseyjar. Hún segir verkefni félagsins margs konar. „Við erum með heimasíðu, hrisey.is , og þar inni eru allar helstu upplýsingar varðandi ferðaþjónustu og lífið í eyjunni. Þangað koma fyrirspurnir sem þarf að svara, við erum með samstarfssamning við Akureyrarbæ um rekstur á tveimur söfnum hérna og sjáum um almenningssalerni og fuglaskoðunarhús. Og við erum að taka á móti bókunum og erum með dagsleyfi ferðaskipuleggjenda, erum að fara með fólk í allskonar ferðir, taka á móti skipum. Þetta nefnilega leynir á sér,“ segir hún. Linda segir markmið ferðaþjónustu í Hrísey ekki vera að fá mikinn fjölda ferðamanna út í eyna, heldur að laða að ferðamenn sem vilja upplifa náttúruna og hæglætið. Hún rifjar upp þegar var gerð tilraun að hafa frítt í Hríseyjarferjuna í einn mánuð yfir sumarið. Það reyndi mjög á innviði samfélagsins. „Þetta var bara alltof mikið. Það voru allir búnir að gefast upp þetta sumar og við hugsum með hryllingi til þessa sumars. Við ætlum aldrei þarna aftur. Það var bara mjög gott að prófa þetta, en aldrei aftur.“ Hrísey í Eyjafirði er önnur stærsta eyjan við Ísland og er hluti af Akureyrarbæ. Við upphaf árs 2026 bjuggu 156 í eynni samkvæmt tölum Hagstofu Íslands. Hægt er að hlusta á þáttinn í heild í spilara RÚV hér að ofan. Einnig var spjallað við hollenskan ferðamann sem leitar uppi kyrrláta staði á Íslandi auk þess sem forvitnast var um starfsemi leik- og grunnskólans.