Úr­vals­vísi­tala Kaup­hallarinnar hefur lækkað um rúm tvö pró­sent það sem af er degi og eru lækkanir á breiðum grunni á ís­lenska hluta­bréfa­markaðnum. Ekkert félag í úr­vals­vísitölunni hefur hækkað í verði það sem af er degi, sam­kvæmt markaðs­upp­lýsingum Kaup­hallarinnar. Heildar­velta nemur um 1,3 milljörðum króna. Bréf Ocu­lis hafa lækkað mest, eða um tæp níu pró­sent, og stóð síðasta við­skipta­verð í 1.420 krónum á hlut. Miðað við það gengi er markaðsvirði augn­lyfjaþróunarfélagsins komið niður í um 88 milljarða króna. Lækkunin kemur í kjölfar mikilla sviptinga í bréfum félagsins síðustu daga. Við­skipta­blaðið fjallaði fyrr í dag um að markaðsvirði Ocu­lis væri komið undir 100 milljarða króna. Fyrir lækkunar­hrinuna nam markaðsvirði félagsins um 247 milljörðum króna, en miðað við núverandi gengi hafa um 160 milljarðar króna horfið af markaðsvirði félagsins á skömmum tíma. Ekki bara vaxtarfélögin að lækka Þrýstingurinn á Ocu­lis fellur nú saman við víðtækari lækkanir á markaðnum. Bréf Al­vot­ech hafa lækkað um rúm fimm pró­sent og Amaroq Minerals um tæp tvö pró­sent. Vaxtarfélög á borð við Ocu­lis og Al­vot­ech eru jafnan viðkvæm þegar fjár­festar draga úr áhættu og endur­meta væntingar um framtíðar­vöxt. Lækkanir dagsins eru þó ekki bundnar við vaxtarfélög. Bréf Arion banka hafa lækkað um rúm­lega 1,5 pró­sent og Ís­lands­banki um tæp 1,4 pró­sent. Hagar lækka um tæp 2,5 pró­sent, Iceland Sea­food um tæp 2,8 pró­sent, Kaldalón um tæp 2,4 pró­sent og Nova um rúm 2,2 pró­sent. Af öðrum félögum í úr­vals­vísitölunni hafa bréf Icelandair lækkað um rúm eitt pró­sent, Festi um rúm 1,2 pró­sent, Eim­skips um rúm 1,3 pró­sent, Eikar um tæp 1,4 pró­sent og Brims um tæp 1,8 pró­sent. Hampiðjan stendur óbreytt. Mest við­skipti hafa verið með bréf Ís­lands­banka, fyrir um 291 milljón króna. Þar á eftir koma Festi, með um 132 milljóna króna veltu, og Icelandair, með um 114 milljónir króna. Við­skipti með bréf Ocu­lis nema rúm­lega 100 milljónum króna, en velta með bréf Al­vot­ech er um 77 milljónir króna og með bréf Amaroq um 71 milljón króna. Markaðurinn ber þess merki að fjár­festar séu að færa sig í varfærnari stöðu. Ocu­lis vegur þungt eftir skarpa lækkun síðustu daga, en verðlækkanirnar í dag ná til flestra geira Kaup­hallarinnar, meðal annars banka, sjávarút­vegs, flutninga, fast­eignafélaga og vaxtarfélaga.