Vaxtarfélögin í Kaup­höllinni lækka enn og eru áfram meðal þeirra félaga sem hafa gefið mest eftir það sem af er ári. Það sem af er við­skiptum dagsins hefur Al­vot­ech lækkað um rúm 6%, Ocu­lis um rúm 3% og Amaroq um tæp 3%. Al­vot­ech stendur í 424 krónum á hlut, Ocu­lis í 1.700 krónum og Amaroq í 145 krónum. Lækkunin bætist ofan á veika þróun frá áramótum. Ocu­lis hefur lækkað um tæp 34% það sem af er ári, Al­vot­ech um tæp 33% og Amaroq um rúm 20%. Við­skipta­blaðið fjallaði á dögunum um að vaxtarfélögin hefðu lækkað mest á árinu. Þá höfðu Ocu­lis, Al­vot­ech og Amaroq öll lækkað mikið, á sama tíma og sjávarút­vegs­félögin skáru sig úr með sterkri hækkun. Sú mynd hefur lítið breyst. Síldar­vinnslan hefur hækkað um tæp 32% frá áramótum, Brim um rúm 26% og Ís­félagið um tæp 23%. Á sama tíma hafa fjár­festar haldið áfram að selja sig niður í félögum þar sem verðmatið byggist að stórum hluta á framtíðaráföngum. Hjá Ocu­lis horfa fjár­festar til fram­gangs lyfjaþróunar og rannsóknarniður­staðna eftir að félagið ákvað að sækja ekki um markaðs­leyfi fyrir OCS-01 augn­dropa við sjón­himnu­bjúg af völdum sykursýki að svo stöddu. Hjá Al­vot­ech skiptir mestu máli hvernig gengur að fá fleiri hliðstæður líftækni­lyfja samþykktar á Bandaríkja­markaði og hvernig sam­skipti félagsins við bandarísk lyfja­yfir­völd þróast. Amaroq hefur einnig lækkað skarpt á árinu, þrátt fyrir hátt gull­verð og jákvæðar fréttir af borunum og upp­byggingu félagsins á Græn­landi. Munurinn á þeim félögum sem hafa hækkað mest og lækkað mest á árinu er því áfram skýr. Fjár­festar hafa verðlagt sjávarút­vegs­félögin hærra í kjölfar sterkrar af­komu og góðrar loðnu­vertíðar, en vaxtarfélögin hafa áfram átt undir högg að sækja. Sjá einnig Vaxtarfélögin lækkað mest á árinu