Líftækni­fyrir­tækið Regenics hefur nú undir­búning á hluta­fjáraukningu fyrir skölun á fram­leiðslu og markaðssókn á Collex, sára­með­ferðar­vöru úr ófrjóvguðum laxa­hrognum. Félagið var með fjár­festa­kynningu í Reykja­vík í síðustu viku en þar var farið yfir stöðu félagsins, rannsóknir á vörunni, fjár­mögnunarþörf og áform um um­sókn til bandaríska mat­væla- og lyfja­eftir­litsins, FDA. Regenics þróar sára­með­ferðar­vörur úr ófrjóvguðum laxa­hrognum og byggir aðal­vara félagsins, Collex, á líf­virkum efnum til meðhöndlunar á brunasárum og lang­vinnum sárum. Í kynningu félagsins kom fram að Regenics hafi sprottið upp úr háskóla­um­hverfi í Noregi og að rannsóknir á tækninni hafi staðið yfir í um tvo ára­tugi. Tæknin geti nýst í ólíkum formum, meðal annars í sáraum­búðum, geli og úða, en Collex er leiðandi vara félagsins í dag. Collex-varan er ekki hefðbundinn plástur heldur hugsuð sem húðstað­gengill eða háþróaðar sáraum­búðir. Hún á að draga úr bólgu, styðja við gróanda sára, örva myndun kolla­gens og viðhalda röku sára­um­hverfi, sem er eitt grund­vallar­at­riða í nútímasára­með­ferð. Regenics er að meirihluta í eigu íslenskra fjárfesta í gegnum félagið Nordic Blue hf., sem var stofnað utan um fjárfestinguna. Nordic Blue á nú 51% hlut í Regenics en IS Haf fjárfestingar slhf., framtakssjóður í rekstri Íslandssjóða, er stærsti hluthafi Nordic Blue með rúmlega 58% hlut. Þekktir íslenskir fjárfestar hafa lagt Nordic Blue til fé á síðustu árum en ef áætlanir ganga eftir gæti Regenics orðið næsta stóra sjávarlíftækniverkefnið með íslenskri aðkomu. Áskrifendur geta lesið viðtal við forstjóra Regenics hér ásamt umfjöllun um hverjir standa að félaginu.