Niels B. Christian­sen, for­stjóri Lego og einn farsælasti stjórnandi dansks at­vinnulífs á síðari árum, varð sex­tugur í gær en af því til­efni fjallar danska við­skipta­blaðið Børsen ítar­lega um feril hans, sem markast af stjórnunar­störfum hjá nokkrum af stærstu og virtustu fyrir­tækjum Dan­merkur. Í um­fjöllun blaðsins er rifjað upp að Christian­sen hafi árið 2017 sent þáverandi stjórnar­for­manni Lego, Jørgen Vig Knudstorp, stutt texta­skila­boð eftir að hann lét af störfum hjá Dan­foss. Þar spurði hann ein­fald­lega hvort tími væri til að ræða saman. Skömmu síðar tók hann við sem for­stjóri Lego. Frá því að hann settist í for­stjórastólinn hjá Lego árið 2017 hafa tekjur og af­koma félagsins tvöfaldast. Velta leik­fanga­fram­leiðandans nemur nú 83,5 milljörðum danskra króna eða um 1.600 milljörðum ís­lenskra króna og er félagið þar með komið í hóp tíu stærstu fyrir­tækja Dan­merkur miðað við tekjur, sam­kvæmt Børsen. Christian­sen er verk­fræðingur að mennt frá Dan­marks Tekniske Uni­versitet og lauk námi þar með meðal­ein­kunnina 12,2 á gamla 13-stiga kvarðanum. Síðar bætti hann við sig MBA-prófi frá Insead í Frakk­landi, þar sem hann var sagður efstur í sínum ár­gangi. Ferill hans hófst hjá ráðgjafar­fyrir­tækinu McKins­ey en hann steig síðar inn í efstu stjórnunar­stöður hjá GN Netcom. Þar var hann meðal annars við stjórn­völinn þegar félagið setti á markað fyrsta Bluet­ooth-heyrnar­tólið. Þaðan lá leiðin til Dan­foss, þar sem hann gegndi ýmsum störfum frá 2004 og var for­stjóri í níu ár. Þegar Christian­sen tók við Dan­foss árið 2008 skall fjár­mála­kreppan á af fullum þunga. Fljót­lega þurfti fyrir­tækið að ráðast í mikinn niður­skurð og árið eftir tapaði reksturinn milljörðum króna. Með áherslu á ein­faldari rekstur og sölu til­tekinna eininga tókst þó að rétta félagið af. Þegar hann lét af störfum hafði Dan­foss stækkað um 60 pró­sent og staða þess styrkst veru­lega. Brott­för hans vakti nokkra at­hygli vegna starfs­loka­samnings sem sam­kvæmt dönskum miðlum nam um 50 milljónum danskra króna, þótt hann hefði sjálfur ákveðið að láta af starfi. Þáverandi stjórnar­for­maður Dan­foss, Jørgen Mads Clausen, sagði engu að síður að Christian­sen hefði lokið hlut­verki sínu hjá félaginu með miklum sóma. Hjá Lego beið hans annað viðsnúnings­verk­efni. Eftir mörg ár sam­fellds vaxtar hafði rekstur félagsins hikstað, gripið var til upp­sagna og ráðist í til­tekt í birgðum. Jafn­framt þurfti að auka nýsköpun og skerpa reksturinn. Undir stjórn Christian­sens hefur Lego hins vegar styrkt stöðu sína á ný og vöru­fram­boð félagsins aldrei verið meira. Í árs­reikningi fyrir 2025 kom fram að 868 mis­munandi vörur væru nú í sölu hjá félaginu. Viðmæ­lendur Børsen lýsa honum sem skörpum, yfir­veguðum og jarðbundnum stjórnanda. Troels Gjerrild, stjórnar­for­maður ráðningar­fyrir­tækisins Od­gers Berndt­son, segir greind hans og skýra sýn hafa ráðið miklu um árangur hans. Kasper Rørsted, fyrr­verandi for­stjóri Adidas, hefur sömu­leiðis lýst honum sem vits­muna­lega for­vitnum og traustum stjórnanda sem standi föstum fótum á jörðinni. Sjálfur hefur Christian­sen sagt að hann leggi meiri áherslu á árangur en að starfs­menn hans fari nákvæm­lega sömu leið og hann sjálfur hefði valið. Skipu­lag þurfi að vera skýrt, en innan þess eigi fólk að hafa svigrúm til að taka ákvarðanir og jafn­vel gera mistök, svo fremi sem það sé gert af heilindum. Þótt hann hafi stýrt fyrir­tækjum í ólíkum greinum, allt frá fjar­skiptum og iðnaði til leik­fanga, hefur tæknin verið rauður þráður í ferli hans. Hann hefur sjálfur sagt að hann sækist eftir störfum þar sem tækni­leg og verk­fræði­leg áskorun sé hluti af verk­efninu og að þess vegna hafi hann til dæmis aldrei séð sjálfan sig fyrir sér sem for­stjóra tann­krems­fyrir­tækis. Með árangri sínum hjá GN Netcom, Dan­foss og Lego hefur Niels B. Christian­sen skipað sér í hóp áhrifa­mestu stjórn­enda Dan­merkur og sam­kvæmt um­fjöllun Børsen hófst nýjasti kaflinn á þeim ferli með einu stuttu sms-i.