Lloyd Blankfein, fyrr­verandi for­stjóri Gold­man Sachs sem stýrði bankanum í gegnum fjár­mála­kreppuna 2008, segir að fólk og fyrir­tæki séu orðin of værukær gagn­vart kerfisáhættu og að fjár­mála­geirinn eigi að haga undir­búningi sínum eins og annað „2008-líkt“ hrun geti skollið á. Í viðtali við Financial Times segir Blankfein að því lengra sem líði milli „upp­gjöra“ á mörkuðum, því meiri hætta sé á að næsta upp­gjör verði harðara. Blankfein leggur áherslu á að þetta sé ekki spá um að hrunið sé yfir­vofandi á morgun eða að hann viti nákvæm­lega hvaðan áfallið kemur. Vandinn sé fremur sá að þegar áföll skella á komi í ljós að margir eigna­flokkar hafi verið metnir á verði sem í reynd er ekki hægt að fá út úr markaði, þegar selja þarf. Hann lýsir því að lykillinn að því að stýra banka í gegnum áföll hafi verið stöðug neyðaráætlunar­gerð og harðneskju­leg hrein­skilni um raun­virði eigna. Í reynd þýði það að meta stöður af mikilli varúð og tryggja að hægt sé að losa um áhættu áður en markaðir lokast. Í heild dregur hann upp mynd af kerfi þar sem áhætta getur safnast upp hljóð­lega, sér­stak­lega þegar góðæri dragast á langinn. Skila­boðin eru því ekki að hrun sé óhjákvæmi­legt á næstunni, heldur að skyn­sam­legast sé að haga áhættustýringu þannig að fyrir­tæki og fjár­festar standi af sér áfall ef og þegar það kemur.