Frá því að ChatGPT varð aðgengilegt síðla árs 2022, hafa fyrirtæki um allan heim varið miklum fjármunum í innleiðingu gervigreindar. Áhrifin á rekstur og framleiðni virðast þó enn takmörkuð og víða er tæknin enn fyrst og fremst notuð í afmörkuðum verkefnum fremur en í kjarnastarfsemi fyrirtækja. Í umfjöllun Financial Times er greint frá niðurstöðum nýrrar rannsóknar Stanford-háskóla . Þar kemur meðal annars fram að lítið bendi til þess að gervigreind valdi umtalsverðri fækkun starfa um þessar mundir. Gögnin sýni að atvinnuþróun í störfum sem talin eru hvað mest útsett fyrir gervigreind, s.s. hugbúnaðarþróun og þjónustustörfum, hafi verið tiltölulega stöðug. Höfundar rannsóknarinnar telja að framleiðniaukning sem sést hafi í tilraunum hafi enn ekki skilað sér að ráði út í atvinnulífið. Mörg fyrirtæki séu enn á innleiðingarstigi. Svipuð mynd kemur fram í könnun franska ríkisfjárfestingarbankans Bpifrance sem Reuters fjallaði um í júnímánuði. Þar sögðust 77% stjórnenda meðalstórra fyrirtækja notast við skapandi gervigreind, en aðeins 17% höfðu orðið vör við mælanlegan ávinning í formi tímasparnaðar eða aukinnar skilvirkni. Þrátt fyrir hraða útbreiðslu gervigreindar bendir Seðlabanki Evrópu (ECB) á að djúp innleiðing hennar sé enn takmörkuð, og hún sé ekki enn orðin hluti af kjarnastarfsemi flestra fyrirtækja. Bankinn bendir á að notkun gervigreindar meðal starfsfólks hafi aukist hratt, úr 26% árið 2024 í 40% árið 2025. Sú þróun sé hraðari en þegar internetið eða einkatölvur náðu fótfestu á sínum tíma. Bankinn telur engu að síður að raunveruleg framleiðniaukning ráðist af því hversu hratt fyrirtækjum tekst að samþætta tæknina inn í daglegan rekstur. Hröð innleiðing gæti aukið framleiðnivöxt um 0,3–0,4 prósentustig á ári næsta áratug, en hægari innleiðing myndi skila um 0,2 prósentustiga árlegum ávinningi.