Af­koma Ís­lands­banka nam 14,5 milljörðum króna á fyrstu sex mánuðum ársins, saman­borið við 12,4 milljarða á sama tíma­bili í fyrra. Arð­semi eigin fjár jókst úr 11,1% í 13,4%. Á öðrum árs­fjórðungi nam af­koman 7,1 milljarði króna og dróst lítil­lega saman frá sama fjórðungi í fyrra, þegar hún var 7,2 milljarðar. Arð­semi eigin fjár var þó 13,3%, saman­borið við 13% árið áður. „Af­koma Ís­lands­banka á öðrum árs­fjórðungi var traust og í megin­at­riðum í samræmi við væntingar,“ segir Jón Guðni Ómars­son, banka­stjóri Ís­lands­banka. Hann segir af­komu kjarna­starf­seminnar sýna að undir­stöður rekstrarins séu sterkar. Hreinar vaxta­tekjur jukust um 10% frá sama fjórðungi í fyrra, en minni um­svif á inn­lendum fjár­magns­markaði og sveiflur á er­lendum mörkuðum höfðu neikvæð áhrif á þóknana­tekjur. Hreinar vaxta­tekjur námu 32,4 milljörðum króna á fyrstu sex mánuðum ársins, saman­borið við 26,8 milljarða á sama tíma­bili í fyrra. Vaxta­munur jókst úr 3,2% í 3,7% og segir bankinn hærri verðbólgu skýra stóran hluta aukningarinnar. Hreinar þóknana­tekjur námu 6,5 milljörðum króna og drógust lítil­lega saman milli ára. Á öðrum árs­fjórðungi lækkuðu þær um 10%, meðal annars vegna minni tekna af fjár­festingar­banka­starf­semi og greiðslumiðlun. Á móti jukust tekjur tengdar lán­veitingum og ábyrgðum. Virðis­rýrnun jókst Virðis­rýrnun fjár­eigna nam tæp­lega 1,7 milljörðum króna á fyrstu sex mánuðum ársins. Á sama tíma­bili í fyrra var 399 milljóna króna virðis­rýrnun bak­færð til tekna. Bankinn segir breytinguna einkum skýrast af aðstæðum ein­stakra lántak­enda. Hlut­fall lána með laskað láns­hæfi hækkaði úr 1,5% í upp­hafi árs í 2,6% í lok júní. Útlán til við­skipta­vina jukust um 3,6% frá áramótum og námu 1.416 milljörðum króna í lok júní. Inn­lán jukust um 7,2% á sama tíma og námu 1.038 milljörðum. Heildar­eignir bankans námu 1.788 milljörðum króna í lok júní, saman­borið við 1.728 milljarða í lok síðasta árs. Eigið fé nam 211,1 milljarði króna, saman­borið við 225,4 milljarða um áramót. Eigin­fjár­hlut­fall var 23% og hlut­fall al­menns eigin­fjárþáttar 1 var 19,1%. Kostnaður jókst á fjórðungnum Stjórnunar­kostnaður nam 8,1 milljarði króna á öðrum árs­fjórðungi og jókst um 800 milljónir frá sama tíma­bili í fyrra. Kostnaðar­hlut­fall bankans hækkaði úr 41% í 43,1% á fjórðungnum. Á fyrstu sex mánuðum ársins lækkaði kostnaðar­hlut­fallið þó úr 44,1% í 40,7%. Launa­kostnaður nam 9,7 milljörðum króna og jókst um 807 milljónir. Þar af tengdust 370 milljónir upp­sögnum og 671 milljón nýju árangurs­tengdu launa­kerfi bankans. Ís­lands­banki áformar að fækka stöðu­gildum um 50 á árinu. Bankinn áætlar að breytingarnar lækki ár­legan launa- og starfs­manna­kostnað um einn milljarð króna þegar áhrifin eru að fullu komin fram árið 2027. Hækka af­komu­spá Ís­lands­banki hækkar af­komu­spá sína fyrir árið og gerir nú ráð fyrir að arð­semi eigin fjár verði yfir 12,5%, saman­borið við fyrri spá um um 12%. Bankinn gerir ráð fyrir að kostnaðar­hlut­fall verði á bilinu 41–43% á árinu og að um helmingur hagnaðar verði greiddur út til hlut­hafa. Eigin­fjár­staða bankans er áfram sterk. Um­fram­eigið fé sem getur nýst til vaxtar, arð­greiðslna eða endur­kaupa nam 23,1 milljarði króna í lok tíma­bilsins. Bankinn greiddi alls 27,8 milljarða til hlut­hafa á fyrri helmingi ársins með arð­greiðslu og endur­kaupum eigin bréfa.