Launa­kostnaður stærri mat­vöru­verslana er að jafnaði aðeins um 10% af veltu, að sögn Bene­dikts S. Bene­dikts­sonar, fram­kvæmda­stjóra Sam­taka verslunar og þjónustu. Í sam­tali við Morgun­blaðið segir Bene­dikt stöðuna því tals­vert frábrugðna veitinga­geiranum, þar sem launa­kostnaður getur numið 50–60% af rekstrar­kostnaði. „Veltan er svo mikil, alla­vega hjá þessum stærri aðilum, að launa­kostnaðurinn hefur verið í kringum 10% þar,“ segir hann. Launa­kostnaður hefur engu að síður farið hækkandi í mat­vöru­verslun eins og annars staðar í at­vinnulífinu. Bene­dikt segir þær hækkanir hafa skilað sér beint út í verðlagið. „Ég held að launa­kostnaðurinn sem hlut­fall af veltu eða fram­legð í mat­vörunni hafi þó verið nokkuð stöðugur, það er að segja að þær hækkanir sem hafa komið fram hafi náð að dekka hækkandi launa­kostnað,“ segir hann. Inn­kaups­verð er þó mun stærri kostnaðar­liður hjá mat­vöru­verslunum og stendur að sögn Bene­dikts undir um 80% af sölu­verði mat­vöru. Launa­hækkanir hafa jafn­framt óbein áhrif á þann kostnað þar sem þær hækka rekstrar­kostnað birgja. Óvissa ríkir um fram­hald kjara­samninga í haust, en Bene­dikt segist treysta því að samningsaðilar sýni skyn­semi. Sjá einnig Verðbólga lík­legast vel yfir viðmiði kjara­samninga „Ég ætla að leyfa mér að trúa að aðilarnir við samnings­borðið beiti ein­hvers konar skyn­semi og átti sig á því að frekari launa­hækkanir, ofan á það launa­skrið sem hefur átt sér stað, fari þvert gegn því mark­miði að draga úr verðbólgu,“ segir hann. Sjá einnig Án opin­berra hækkana hefðu kjara­samningar haldið