Olíu­verð er komið yfir 95 dali á tunnu eftir að Donald Trump Bandaríkja­for­seti hótaði frekari hernaðarað­gerðum gegn Íran. Verðið á Brent-olíu hækkaði um meira en 4% í morgun og stendur í 95,24 dali á tunnu þegar þetta er skrifað. Mað það vera hæsta verð frá 11. júní. Olíu­verð hefur hækkað um 30% frá byrjun júlí eftir að stríð Bandaríkjanna og Írans færðist aftur í aukana. Trump sagði á þriðju­dag að Íranir kynnu að hafa flutt mikilvæga hluta kjarn­orku­vopnaáætlunar sinnar í neðanjarðar­mann­virki í miðhluta Írans. Bandaríkja­for­seti sagði í Hvíta húsinu að Bandaríkin myndu ráðast á svæðið „mjög fljót­lega“ og af miklum þunga. Um­mælin féllu á fundi hans með Joseph Aoun, for­seta Líbanons. Hótanir Trump koma á sama tíma og ótti eykst á olíu­markaði vegna siglinga um Hor­mússund. Flutningar um sundið hafa dregist veru­lega saman síðustu daga og birgðastaða á olíu­markaði er sögð orðin þröng. Gold­man Sachs varaði við því í byrjun vikunnar að Brent-olía gæti hækkað í 120 dali á tunnu ef truflanir á siglingum um Hor­mússund vara fram á fjórða árs­fjórðung. Um fimmtungur olíu­við­skipta heimsins fór um sundið fyrir stríðið. Skip orðið fyrir árásum Að minnsta kosti sjö skip hafa orðið fyrir árásum á Hor­mússundi frá því vopna­hlé rann út. Sam­kvæmt Financial Times hafa Íranir beint árásum að skipum sem reynt hafa að sigla um sundið nálægt strönd Óman, þar sem þau njóta að ein­hverju leyti verndar bandarískra loft­varna. Af 15 siglingum sem greindar voru á mánu­dag fóru öll skipin nema tvö þá leið sem Íranir hafa lagt til. Tvö olíu­flutninga­skip gríska út­gerðarfélagsins Dynacom, sem fóru Óman-leiðina, urðu fyrir írönskum eld­flaugum. Íran hefur varað við því að ný árás Bandaríkjanna á kjarn­orku­mann­virki landsins verði talin út­víkkun stríðsins á svæðinu. Átökin hafa einnig breiðst út til banda­manna Bandaríkjanna á Persaflóa. Íran hefur aukið árásir á þá síðustu vikur. Fjórir bandarískir her­menn hafa fallið í átökum í Mið-Austur­löndum síðustu daga. Stríðið kostað 37,5 milljarða dala Bandaríska varnar­málaráðu­neytið áætlar að stríðið við Íran hafi þegar kostað 37,5 milljarða dala. Pete Heg­seth varnar­málaráðherra Bandaríkjanna greindi frá því fyrir þing­nefnd á þriðju­dag. Sú tala nær ekki til kostnaðar við að endur­reisa bandarískar her­stöðvar sem hafa orðið fyrir árásum Írana. Hvíta húsið hefur óskað eftir um 67 milljörðum dala í viðbótar­fjár­veitingu til að mæta kostnaði við stríðið. Heg­seth sagði að draga þyrfti úr þjálfun her­manna ef fjár­veitingin fengist ekki fljótt. Dan Ca­ine, for­maður sam­eigin­legrar herráðs­nefndar Bandaríkjanna, vildi ekki segja hvort Bandaríkin myndu auka hernaðarað­gerðir sínar enn frekar. Hann sagði þó að reynslan sýndi að loftárásir einar og sér hefðu tak­mörk. Bandaríkja­her gerði árásir á Íran á þriðju­dagskvöld, fimmtándu lotu árása á tveimur vikum. Sam­kvæmt her­stjórn Bandaríkjanna í Mið-Austur­löndum beindust árásirnar meðal annars að stjórnstöðvum, sjóhernaðar­getu, flugskýlum, dróna­geymslum og flutningsinn­viðum íranska hersins.