Jamie Dimon, for­stjóri JP­Morgan Chase, segir fjár­festa van­meta áhættuna sem blasir við heims­hag­kerfinu og mörkuðum. Hann segist sjálfur hvorki myndu kaupa breiðan hluta­bréfa­markað né löng bandarísk ríkis­skulda­bréf á núverandi verði. Þetta kom fram í klukku­stundar­löngu viðtali Dimons við Wil­fred Frost hjá CNBC en hægt er að horfa á brot úr viðtalinu neðst í fréttinni. Dimon sagði markaði ekki verð­leggja nægi­lega þá pólitísku og ríkis­fjár­mála­legu áhættu sem safnast hefur upp. „Ég held að þessi áhætta sé lík­lega meiri en margir telja,“ sagði Dimon. Hann nefndi þar meðal annars stríðið í Úkraínu, átök fyrir botni Persaflóa, spennu milli Bandaríkjanna og Kína og aukin út­gjöld til varnar­mála á sama tíma og halli á ríkis­sjóðum fer vaxandi. Að­spurður hvort markaðir væru að van­meta líkurnar á stóru áfalli sagði Dimon erfitt að vita nákvæm­lega hvað væri þegar komið inn í verð eigna. „Það getur verið að eitt­hvað sé þegar verðlagt, en það sem er ekki verðlagt er hvað gerist í raun,“ sagði hann. Um­mælin koma eftir sterka þróun á hluta­bréfa­mörkuðum. S&P 500-vísi­talan hefur hækkað um tæp 10% á árinu, meðal annars vegna áfram­haldandi neyslu, minni verðbólguþrýstings og mikillar bjartsýni í kringum gervi­greind. Þá skiluðu JP­Morgan og aðrir stórir bandarískir bankar ný­lega sterkum upp­gjörum, ekki síst vegna mikilla tekna af markaðsvið­skiptum og fjár­festingar­banka­starf­semi. Dimon viður­kenndi að heims­hag­kerfið væri að sumu leyti þraut­seigara en áður, meðal annars vegna minni orku­háðar en á fyrri ára­tugum. Það úti­loki þó ekki að áfall geti að lokum hrint af stað viðsnúningi á mörkuðum. „Það þarf kannski fleiri strá á úlfalda­bakið til að ná vendi­punktinum,“ sagði hann og bætti við að jafn­vel ný stig­mögnun stríðsástands dygði ekki endi­lega ein og sér til að kveikja slíkan viðsnúning. Varar við skulda­vanda ríkisins Dimon sagði viðvarandi halla­rekstur bandaríska ríkisins að lokum verða að vanda­máli. Þegar skuldir hlaðist upp muni skulda­bréfa­fjár­festar krefjast hærri ávöxtunar fyrir að fjár­magna ríkið. „Mín skoðun er sú að þetta verði vanda­mál,“ sagði hann. Hann sagðist ekki sjálfur myndu kaupa löng bandarísk ríkis­skulda­bréf á núverandi verði. Jafn­vel þótt verðbólga færi aftur niður í 2% mark­mið bandaríska seðla­bankans taldi hann eðli­legt að ávöxtunar­krafa tíu ára ríkis­skulda­bréfa væri á bilinu 4% til 4,5%. Hann sæi því tak­markaða hækkunar­mögu­leika í verði ríkis­skulda­bréfa. Dimon var ekki bjartsýnni á hluta­bréfa­markaðinn í heild. Hann sagðist geta skoðað einstök hluta­bréf ef um væri að ræða sér­stak­lega gott fjár­festingar­tækifæri, en ekki vilja kaupa breiðan markað á núverandi verðmati. Gervi­greindin skilar sér, en ekki endi­lega til allra Dimon ræddi einnig gervi­greindar­bylgjuna og líkti henni við upp­haf Inter­netsins. Hann sagði út­gjöld fyrir­tækja til gervi­greindar gríðar­leg og taldi lík­legt að tæknin myndi á endanum skila miklum ávinningi. „Mun þetta borga sig í heild? Lík­lega, rétt eins og inter­netið gerði,“ sagði hann. Hann varaði þó við því að það þýddi ekki að allir núverandi sigur­vegarar yrðu endan­legir sigur­vegarar. Í net­bólunni hefðu fyrir­tæki á borð við Ya­hoo og Nets­ca­pe verið áberandi snemma, en síðar hefðu Goog­le og Face­book orðið mun stærri sigur­vegarar. „Mun þetta borga sig á þann hátt sem þú býst við og á þeim tíma sem þú býst við? Alls ekki,“ sagði Dimon.