Netverslunin Boozt fagnar í næsta mánuði fimmtán ára afmæli. Fyrirtækið hefur í síauknum mæli verið að færast yfir á netið og ríkir mikil samkeppni á þeim markaði. Meðal fyrirtækja sem Boozt keppir við á markaðnum eru risar á borð við Amazon og Asos, svo fáeinir séu nefndir. Hermann Haraldsson, forstjóri fyrirtækisins, segir Boozt skera sig úr frá samkeppnisaðilum með áherslu sinni á Norðurlöndin. „Lagerinn okkar, sem er hundrað þúsund fermetra og staðsettur í Svíþjóð, er eftir því sem ég best veit stærsti róbótalager í allri Evrópu. Róbótarnir eru alls um 1.300 talsins. Með því að reka einn stóran lager sem er mjög sjálfvirkni- og tæknivæddur náum við að halda kostnaði í lágmarki og tryggjum um leið samkeppnishæfni fyrirtækisins. Það endurspeglast ekki síst í þeirri staðreynd að fáar ef nokkrar netverslanir á borð við okkar hafa náð álíka rekstrarhagnaðarhlutfalli og Boozt á undanförnum árum.“ Í byrjun síðasta árs sagði Boozt upp yfir hundrað manns eða sem nam um 10% af heildarfjölda starfsmanna á þeim tíma. Uppsagnirnar voru skref í átt að langtímamarkmiði fyrirtækisins um 10% framlegð ásamt því að byggja upp sjálfbæran og samkeppnishæfan rekstur. Þá sagði fyrirtækið skipulagsbreytingarnar endurspegla vaxandi áhrif tækninýjunga og aukinnar innleiðingar gervigreindartóla í allri virðiskeðju þess. Hraðar framfarir gervigreindar og annarra tæknilausna fela að mati Hermanns í sér stór tækifæri til framtíðar fyrir Boozt. „Allur hugbúnaður og kerfi sem starfsemi fyrirtækisins byggir á eru hönnuð innanhúss og stjórnað af okkur. Það gerir okkur kleift að innleiða gervigreind, sem er að taka stórstigum framförum á degi hverjum, hratt og örugglega inn í okkar rekstur. Gervigreindin er þegar farin að leysa hin ýmsu verkefni innan okkar raða og tækifærin eru nánast óþrjótandi,“ segir hann og nefnir dæmi um lausn sem Boozt er með í vinnslu þar sem gervigreind er beitt til að bæta kaupupplifun og þjónustu við viðskiptavini. „Hingað til hafa hefðbundnar verslanir haft það forskot á netverslanir þegar kemur að þjónustu að geta veitt viðskiptavinum beina ráðgjöf. Aftur á móti geta netverslanir nú nýtt sér gervigreind til að þróa stafrænan ráðgjafa sem veitir viðskiptavinum sambærilega ráðgjöf og starfsfólk verslana. Þegar einstaklingur er t.d. á leið í brúðkaup og vantar ný föt til að klæðast við það tilefni, þá getur hann einfaldlega leitað til stafræna ráðgjafans eftir hugmyndum. Þannig geta netverslanir komist nær því að veita sínum viðskiptavinum sömu þjónustu og hefðbundnar verslanir.“ Hermann segir lausnina enn sem komið er á þróunarstigi og væntir þess ekki að hún verði sett í loftið á allra næstu mánuðum. „Ég er viss um að það sé ekki meira en eitt til tvö ár í að við getum farið að bjóða viðskiptavinum okkar upp á þessa þjónustu.“ „Planið er að halda áfram að stækka, þá sérstaklega á Norðurlöndunum. Það eru miklir vaxtarmöguleikar til staðar á Norðurlöndunum enda er ásókn neytenda í að versla á netinu alltaf að aukast,“ segir Hermann, spurður um framtíðarhorfur, og bætir við að sóknartækifærin séu einnig til staðar á öðrum mörkuðum víða um Evrópu. „Um 10% af veltu Boozt kemur frá öðrum mörkuðum en Norðurlöndunum. Við erum sem dæmi að selja vörur til Þýskalands, Hollands og Sviss. Það eru klárlega sóknartækifæri á þessum mörkuðum og víðar, enda nýtur skandinavísk hönnun vinsælda um alla álfuna. Við einblínum sem fyrr mest á Norðurlöndin en markmiðið er jafnframt að færa út kvíarnar jafnt og þétt með tíð og tíma.“ Nánar er fjallað um málið í Viðskiptablaðinu . Áskrifendur geta lesið fréttina í heild hér .