Hagkerfið hefur kólnað hressilega eftir kröftugt vaxtarskeið fyrstu árin eftir Covid heimsfaraldurinn. Þannig nam hagvöxtur 1,3% á síðasta ári eftir 1,3% samdrátt árið áður. Árin á undan var mikill hagvöxtur eða 5% árið 2021, 9% árið 2022 og 5,6% árið 2023. Miðað við nýlegar hagspár bankanna og Seðlabankans er útlit fyrir áframhaldandi hægagang í hagkerfinu. Greiningardeildir stóru viðskiptabankanna þriggja, Arion banka, Íslandsbanka og Landsbankans, hafa gefið út hagspár fyrir tímabilið 2026-2028. Landsbankinn reið á vaðið og gaf greiningardeild bankans út hagspá um miðjan apríl. Í lok sama mánaðar gerði greiningardeild Arion banka slíkt hið sama og í síðustu viku gaf greining Íslandsbanka svo út sína spá. Nýjustu þjóðhagsspá Seðlabanka Íslands má finna í nýjasta riti Peningamála sem kom út fyrir þremur vikum. Hagstofa Íslands gaf síðan lengi vel út þjóðhagsspár en hætti því í byrjun þessa árs. Bankarnir og Seðlabankinn eru sammála um að hagkerfið muni vaxa hægt á næstu árum. Seðlabankinn reiknar með 1,6% hagvexti í ár, 1,8% hagvexti árið 2027 og 2,2% hagvexti árið 2028. Hagkerfið seiglast áfram Yfirskrift hagspár Arion banka er: Íslenska hagkerfið seiglast áfram. Bankinn reiknar með 1,6% hagvexti á þessu ári. Eftir hóflegan hagvöxt á síðasta ári þar sem undirliðir landsframleiðslunnar toguðu í ólíkar áttir, hafi margir bundið vonir við að yfirstandandi ár yrði gjöfulla. Röð útflutningsáfalla á haustmánuðum síðasta árs, stríðsrekstur við Persaflóa og vaxandi verðbólga hafi aftur á móti gert þær vonir að engu og það endurspeglist í lægri hagvaxtarspá en áður. Stóru breytingarnar liggi í einkaneyslunni annars vegar og útflutningshorfum hins vegar. Verðbólgu- og vaxtaumhverfið hafi dregið úr væntingum heimila, sem á sama tíma standi frammi fyrir hækkandi atvinnuleysi og raunverðslækkunum á húsnæði. Útlit sé fyrir að samspil þessara þátta dragi úr neysluvilja heimilanna og þar með vexti einkaneyslunnar í ár. „Þrátt fyrir hægari vöxt – og samdrátt í neyslu á hvern einstakling – verður einkaneyslan engu að síður ein af megin driffjöðrum hagvaxtar, einkum þegar líða tekur á spátímann, enda er fjárhagsstaða heimilanna almennt séð sterk og raunlaun að hækka,“ segir í spá bankans. Á sama tíma eigi útflutningsgreinarnar á brattann að sækja, þrátt fyrir sólmyrkva, gjöfula loðnuvertíð og jákvæð tíðindi af endurræsingu Norðuráls. Í ár muni mestu um tímabundinn samdrátt í álútflutningi, en spáður samdráttur í komum ferðamanna sé meira áhyggjuefni. Engu að síður sé útlit fyrir jákvætt framlag utanríkisverslunar til hagvaxtar, þar sem innflutningur í tengslum við gagnaver dragist saman milli ára. Fjárfestingar í gagnaverum verði engu að síður miklar – bara minni en á síðasta ári. Nánar er fjallað um málið í Viðskiptablaðinu sem kom út í morgun. Áskrifendur geta lesið fréttina í heild hér .