Icelandair flutti 464 þúsund farþega í maí, sem er fjögurra pró­senta fjölgun frá sama mánuði í fyrra. Sætanýting félagsins var 83 pró­sent og jókst um 3,4 pró­sentu­stig á milli ára. Hún hefur ekki áður verið hærri í maímánuði hjá félaginu. Farþegum á leið til Ís­lands fjölgaði um átta pró­sent milli ára og farþegum frá Ís­landi fjölgaði um 24 pró­sent. Icelandair segir þróunina vera í takt við áherslu félagsins á þessa markaði, sem skili nú hærri eininga­tekjum. Af farþegum félagsins í maí voru 30 pró­sent á leið til Ís­lands, 19 pró­sent á leið frá Ís­landi, 45 pró­sent voru tengi­farþegar og fimm pró­sent ferðuðust innan­lands. Fram­boð félagsins, mælt í sætiskíló­metrum, dróst saman um tvö pró­sent milli ára en farþega­um­ferð, mæld í tekju­farþega­kíló­metrum, jókst um tvö pró­sent. Á sama tíma hækkaði ávöxtun á hvern farþega­kíló­metra, eða yi­eld, um fjögur pró­sent og nam 8,92 bandarískum sentum. Á fyrstu fimm mánuðum ársins hefur Icelandair flutt tæp­lega 1,8 milljónir farþega, sem er níu pró­senta fjölgun frá sama tíma­bili í fyrra. Sætanýting á tíma­bilinu var 81,4 pró­sent, saman­borið við 80,2 pró­sent á sama tíma í fyrra. Stund­vísi félagsins var 82,3 pró­sent í maí og dróst saman um 1,8 pró­sentu­stig milli ára. Seldum blokktímum í leigu­flugi fækkaði um tvö pró­sent en frakt­flutningar, mældir í tonn­kíló­metrum, jukust um fjögur pró­sent. Kol­efnislosun á hvern tonn­kíló­metra dróst saman um átta pró­sent milli ára. Icelandair segir það skýrast af aukinni nýtingu spar­neytnari flug­véla, áfram­haldandi um­bótum í rekstri og hárri sætanýtingu. „Eftir­spurn var sterk í maí sem endur­speglast í metsætanýtingu og áfram­haldandi vexti á mörkuðunum til og frá Ís­landi,“ segir Bogi Nils Boga­son, for­stjóri Icelandair. Hann segir maí jafnan vera krefjandi upp­takt að sumaráætlun félagsins og að góð sætanýting endur­spegli árangur í því að fanga eftir­spurn og sam­hæfa áætlunina að mörkuðum í að­draganda háannatímans. „Við höfum brugðist við áfram­haldandi háu elds­neytis­verði með því að aðlaga fram­boð og leggja áherslu á að­gerðir til þess að auka skil­virkni, meðal annars með því að flýta endur­nýjun flug­flotans eins og áður hefur verið til­kynnt um,“ segir Bogi. Tölurnar birtast á sama tíma og kjara­viðræður Icelandair og Félags ís­lenskra at­vinnu­flug­manna hafa verið í brenni­depli. Fjölmiðlar greindu um helgina frá því að viðræðurnar væru áfram í höndum ríkissátta­semjara og að Icelandair hefði kynnt nýjar til­lögur sem samninga­nefnd flug­manna hefur til skoðunar. Kjaramálin hafa verið talin mikilvæg fyrir rekstrar­horfur félagsins, ekki síst í ljósi áherslu Icelandair á að bæta skil­virkni og sam­keppnis­hæfni rekstrarins. Um­ræðan hefur meðal annars snúist um sveigjan­leika, mönnun og mögu­leika félagsins til að bregðast við mikilli eftir­spurn á háannatíma. Bogi segir félagið einnig hafa fengið góðar viðtökur við nýju flugi til Fen­eyja, sem hófst í maí. Þá nefnir hann markaðs­her­ferð Icelandair þar sem aug­lýst var eftir „versta ljós­myndara í heimi“ til að kynna Ís­land sem áfangastað. Sjá einnig Icelandair hefur valið „versta ljós­myndara heims“ „Viðbrögðin fóru fram úr væntingum en við fengum tæp­lega 130 þúsund um­sóknir frá 178 löndum. Ljós­myndarinn sem varð fyrir valinu mun hjálpa okkur að sanna þá kenningu okkar að það sé nánast ómögu­legt að taka slæma ljós­mynd af ís­lenskri náttúru,“ segir Bogi.