Hag­vöxtur mældist 2,7% á fyrsta árs­fjórðungi sam­kvæmt ný­birtum bráða­birgðatölum Hag­stofunnar. Í nýrri greiningu Jóns Bjarka Bents­sonar, aðal­hag­fræðings Ís­lands­banka kemur fram að hag­vöxturinn sé nokkru meiri en bankinn hafði vænst. Undir yfir­borðinu togist þó á ólíkir kraftar. Þjóðarút­gjöld drógust saman vegna mun minni fjár­festingar en fyrir ári, en utan­ríkis­við­skipti lögðu mikið til hag­vaxtarins, einkum vegna þess að inn­flutningur var mun minni en á sama tíma í fyrra. Landsmönnum fjölgaði um 1,3% á fjórðungnum frá sama tíma í fyrra og því var hag­vöxtur á mann ríf­lega 1%. Jón Bjarki bendir jafn­framt á að fjöldi vinnu­stunda hafi nánast staðið í stað milli ára og að fram­leiðni vinnu­afls hafi því aukist um nokkuð á þriðja pró­sent milli ára. Hann varar þó við því að taka slíkum út­reikningum með fyrir­vara, enda séu árs­fjórðungstölur sveiflu­kenndar og grunnáhrif geti haft mikil áhrif á ein­staka fjórðunga. Einka­neysla reyndist seig þrátt fyrir þráláta verðbólgu og hátt vaxta­stig. Hún jókst um 2,2% að raun­virði frá fyrsta árs­fjórðungi síðasta árs. Þar vógu aukin bif­reiða­kaup heimila og meiri neysla á ferðalögum er­lendis á móti minnkandi al­mennri neyslu innan­lands. Sam­neysla hins opin­bera jókst um 0,8%. Mesta veik­leikann var að finna í fjár­festingu. Fjár­muna­myndun dróst saman um 12% að raun­virði milli ára á fjórðungnum. Sam­dráttur varð í öllum helstu undir­liðum; fjár­festing fyrir­tækja dróst saman um 12%, fjár­muna­myndun hins opin­bera um 18,5% og fjár­festing í nýju íbúðar­húsnæði um rúm 8%. Jón Bjarki bendir þó á að fjár­festingar­tölur í árs­fjórðungs­legum þjóðhags­reikningum sveiflist mikið og séu gjarnan endur­skoðaðar meira en aðrir undir­liðir. Á fyrsta árs­fjórðungi síðasta árs hafi fjár­festingar­vöxtur verið ríf­lega 17%, þannig að grunnáhrif skýri lík­lega stóran hluta sam­dráttarins nú. Þá hafi takturinn í einstökum stór­verk­efnum, svo sem upp­byggingu gagna­vera, mikil áhrif á árs­fjórðungstölurnar. Í janúar spáði Ís­lands­banki 0,6% hag­vexti á árinu. Frá þeim tíma hafi út­flutnings­horfur batnað, meðal annars vegna myndar­legrar loðnu­vertíðar, betri horfa í ferðaþjónustu fyrir háönnina og minni röskunar á ál­fram­leiðslu á Grundar­tanga en áður var vænst. Á móti verði vextir lík­lega hærri á árinu en bankinn hafði áður gert ráð fyrir, með til­heyrandi áhrifum á neyslu og fjár­festingu. Seðla­bankinn spáði í síðustu viku 1,6% hag­vexti á árinu. Jón Bjarki segir þróunina það sem af er ári benda til þess að vöxturinn verði í grófum dráttum á því róli. Það sé ekki lakasta niður­staða í ljósi krefjandi aðstæðna er­lendis, þrálátrar verðbólgu og hás vaxta­stigs.