Túlkun fjármálaundanþágu virðisaukaskatts hefur verið algengt þrætuepli í málum skattyfirvalda á síðustu árum. Í málunum hafa umtalsverðir fjárhagslegir hagsmunir verið undir, einkum í tengslum við innflutning erlendra fyrirtækja á verðmætum tölvubúnaði til landsins sem hýstur er í gagnaverum. Að mati KPMG hefur sú aðferðafræði sem skattyfirvöld hafa lagt til grundvallar við túlkun fjármálaundanþágunnar verið í mörgum tilvikum röng og grafið undan atvinnustarfsemi aðila. Slík túlkun hefur oftar en ekki leitt til þess að starfsemi sem ekki felur í sér fjármálaþjónustu að nokkru leyti hefur samt sem áður verið talin undanþegin virðisaukaskatti á grundvelli fjármálaundanþágunnar. Endanleg niðurstaða í þessum málum liggur ekki fyrir og enn er deilt um þessa túlkun undanþágunnar fyrir dómstólum. Yfirskattanefnd hafnar túlkun ríkisskattstjóra Í nýlegum úrskurði yfirskattanefndar (YSKN) nr. 32/2026, í máli sem KPMG rak fyrir kæranda á stjórnsýslustigi, er tekin afstaða til mikilvægra álitaefna sem varða gildissvið fjármálaundanþágu virðisaukaskatts. Málið varðaði endurgreiðslu virðisaukaskatts til erlends fyrirtækis, sem hafði með höndum þróun hugbúnaðar til úrvinnslu fjármálagagna og sölu á aðgangi að honum til nota í viðskiptum á fjármálamörkuðum. Ríkisskattstjóri synjaði fyrirtækinu um endurgreiðslu virðisaukaskatts af innflutningi tölvubúnaðar til nota í gagnaveri hér á landi, þar sem hann taldi starfsemi fyrirtækisins undanþegna virðisaukaskatti á grundvelli fjármálaundanþágu virðisaukaskattslaga. Taldi ríkisskattstjóri að þjónusta sú er kærandi veitti yrði lögð að jöfnu við eignastýringu fjármálafyrirtækja fyrir hönd þriðju aðila. Í úrskurðinum hafnaði YSKN þessari túlkun ríkisskattstjóra og felldi ákvörðunina úr gildi. Benti YSKN á að við túlkun undanþágunnar væri það eðli þjónustu sem ræður því hvort hún falli undir undanþáguna, en ekki hver veitir hana eða hverjum hún er veitt. Tók nefndin fram að þegar um er að tefla útvistun aðila, sem hafa með höndum fjármálaþjónustu, á einstökum þáttum starfsemi sinnar til annarra aðila verður að leggja til grundvallar að hlutaðeigandi þjónusta sé eðlilegur og nauðsynlegur þáttur í hinni undanþegnu starfsemi og feli í sér ábyrgð á yfirfærslu réttinda í lagalegu og efnahagslegu tilliti til að teljast vera í beinum tengslum við sölu fjármálaþjónustu og falla undir undanþáguákvæðið. Taldi YSKN að ríkisskattstjóra hefði ekki tekist að sýna fram á að þjónusta kæranda yrði lögð að jöfnu við eignastýringu, enda tæki kærandi engar ákvarðanir um viðskipti þannig að lagalega bindandi væri fyrir kaupendur þjónustu félagsins, hvort sem væri fyrir hönd kaupendanna sjálfra ellegar endanlegra viðskiptavina þeirra. Var því ekki talið að þjónusta kæranda fæli í sér ábyrgð á yfirfærslu réttinda eða fullnustu fjármálalegra athafna í lagalegum og fjármálalegum skilningi. Dró YSKN þannig skýr mörk milli annars vegar undanþeginnar fjármálaþjónustu og hins vegar skattskyldrar tækniþjónustu, gagnavinnslu og annarrar stoðþjónustu sem seld er til aðila sem stunda fjármálastarfsemi. Mikilvæg niðurstaða fyrir rekstrarumhverfi gagnavera Að mati KPMG bendir niðurstaðan til þróunar í rétta átt við túlkun undanþágunnar og ná áhrif úrskurðarins langt út fyrir niðurstöðu þessa máls sem til meðferðar var hjá YSKN, ekki síst vegna þeirrar skýru aðferðafræði sem nefndin leggur til grundvallar við afmörkun undanþágunnar og heimfærslu atvinnustarfsemi undir gildissvið hennar. Þessi niðurstaða hefur því verulega þýðingu, enda stuðlar hún að aukinni festu og fyrirsjáanleika í rekstrarumhverfi gagnavera þar sem nokkur óvissa hefur ríkt á undanförnum árum hvað varðar skattalega stöðu viðskiptavina þeirra. Höfundar starfa hjá KPMG Law. Greinin birtist fyrst í Viðskiptablaðinu .