Ekki er útlit fyrir að beinar hrefnuveiðar fari fram við Ísland í sumar fimmta árið í röð. Engin umsókn hefur borist atvinnuvegavegaráðuneytinu um veiðar. Í fyrra barst ein umsókn frá fyrirtækinu Tjaldtanga ehf. sem fékk leyfi en hóf ekki veiðar. Ný ráðgjöf Hafrannsóknastofnunar var gefin út í apríl síðastliðnum. Hún hljóðaði upp á 168 hrefnur sem var um 23% lækkun frá fyrri ráðgjöf. Fyrir síðustu helgi barst svo tilkynning frá Hafrannsóknastofnun um leiðréttingu á nýútkominni hrefnuráðgjöf. Stofnunin hafið þá uppgötvað að villa var í ráðgjöfinni. Það hafði sem sagt farist fyrir að lækka útreiknaða ráðgjöf frá stofnmatslíkani um 20% í varúðarskyni eins og kveðið er á um í ráðgjafarreglum Alþjóðhvalveiðiráðsins þegar nýjar talningar liggja ekki fyrir. Rágjöfin fyrir árið 2026 er því ekki meira en 134 dýr á íslenska landgrunnssvæðinu. Aldrei veiðst upp í ráðgjöf Eftir því var tekið að sumir ráku upp ramakvein þegar fyrri ráðgjöf Hafró var kynnt. Lýstu margir yfir að fráleitt væri að svo mikill niðurskurður yrði í ráðgjöfinni meðan sjórinn væri fullur af hval. Til þess ber þó að líta hrefnuráðgjöf hefur ekki sett mönnum skorður í þessum veiðum. Veiðar hafa verið ákaflega takmarkaðar við Ísland síðustu áratugi. 2016 hljóðaði ráðgjöfin upp á 224 hrefnur fyrir árin 2016-2018 en það ár var ráðgjöfin lítillega lækkuð í 217 dýr á ári fyrir tímabilið 2018-2025. Þessi ráðgjöf stóð óbreytt í sjö ár. En hefur nú lækkað í 134 dýr eins og fyrr segir. Hvalveiðar voru bannaðar á Íslandi 1986 en ákveðið var að hefja þær að nýju í vísindaskyni árið 2003. Hvalveiðar hófust svo aftur í atvinnuskyni árið 2006. Síðustu tíu ár hafa verið veidd samtals 64 dýr, þar af langmest árið 2016 þegar 46 dýr voru veidd og 2017 þegar þau voru 17. Veiðarnar voru mun umfangsmeiri áratuginn þar á undan, þ.e. frá 2006 til 2016. Þannig voru veiddar 335 hrefnur á árunum 2007 til 2015 á Faxaflóasvæðinu sem hefur verið helsta veiðisvæði hrefnu. Faxaflóanum lokað Það sem breyttist milli þessara tveggja áratuga voru svæðisbundnar reglur um hvalveiðar í Faxaflóa sem upphaflega voru settar af Steingrími J. Sigfússyni árið 2009, reglugerð frá 2013 sem festi bannið í sessi og núgildandi reglugerð frá 2017 sem stækkaði bannsvæðið verulega. Bakgrunnur þessara reglugerða var að koma í veg fyrir árekstra milli hvalaskoðunar og hvalveiða. Eftir reglugerðina 2017 dofnaði verulega áhuginn fyrir hrefnuveiðum enda Faxaflóinn verið lykilsvæði í þessum veiðum og næst löndunarstöðum á Akranesi og Hafnarfirði. Á sama tíma blómstra hrefnuveiðar við Noregsstrendur. Fiskifréttir sögðu frá því nýlega að heimilt er að veiða 1.641 hrefnu á þessu ári sem er aukning um 235 dýra frá árinu 2025. Í fyrra stunduðu þar tíu skip hrefnuveiðar og aflinn var 429 dýr, langt undir 1.406 dýra kvóta.