Yfirskattanefnd hefur fallist á að sala Leikdags ehf., rekstraraðila Keiluhallarinnar í Egilshöllinni, á afnotum á keilubrautum sé undanþegin virðisaukaskatti. Nefndin ákvað að fella úr gildi endurákvörðun ríkisskattstjóra á virðisaukaskatti Keiluhallarinnar á árunum 2021-2023. Málskostnaður til greiðslu úr ríkissjóði var ákvarðaður 700 þúsund krónur. Taldi mál Minigarðsins fordæmisgefandi Ríkisskattstjóri kvað upp úrskurð 16. október 2025 um endurákvörðun virðisaukaskatts Keiluhallarinnar. Embættið taldi að félaginu hefði borið að innheimta virðisaukaskatt af sölu á aðgangi að keilubrautum enda yrði ekki litið svo á að starfsemin gæti talist til íþróttastarfsemi í skilningi undanþáguákvæðis laga um virðisaukaskatt. Að áliti embættis ríkisskattstjóra er starfsemi félagsins ekki aðeins fólgin í sölu á aðgangseyri að íþróttamannvirki og afnotum af búnaði þess, til íþróttaiðkunar, heldur væru þau viðskipti nátengd og samtvinnuð annarri starfsemi félagsins, svo sem veitingarekstri. „Breytti engu þótt gólfflötur keilubrautanna væri einvörðungu notaður til iðkunar keilu. Við hlið keilusalarins væri setusvæði þar sem iðkendur gætu notið veitinga frá veitingastað félagsins og greiður aðgangur væri að bar sem félagið starfrækti í sama húsnæði.“ Embættið mat það sem svo út frá markaðsefni félagsins að aðgangur að keilubrautarleigu þess teldist afþreying í leikjasal fremur en að um aðgangseyri að íþróttamannvirki væri að ræða. „Að mati ríkisskattstjóra gæti húsnæðið, þar sem félagið ræki aðstöðu til iðkunar keilu, sportbar og veitingastað, ekki talist íþróttamannvirki í hefðbundnum skilningi þess orðs.“ Ríkisskattstjóri hafði einnig til hliðsjónar úrskurð yfirskattanefndar frá árinu 2024 um að Minigarðinum bæri að innheimta virðisaukaskatt af afnotum á minigolfvelli staðarins. Ríkisskattstjóri taldi úrskurð nefndarinnar í því máli fordæmisgefandi. Segja „gryfjuna“ vera skýrt afmarkaða Keiluhöllin, sem leigir út 22 keilubrautir, segir í kröfugerð sinni að leggja verði þann skilning í hugtakið íþróttamannvirki í ákvæðinu að það taki til manngerðs rýmis sem sérstaklega sé útbúið til iðkunar íþróttar af einhverjum þeim toga sem stunduð sé innan vébanda Íþrótta- og Ólympíusambands Íslands eða Ungmennafélags Íslands. Í 2. mgr. 5. gr. íþróttalaga sé kveðið á um að Íþrótta- og Ólympíusamband Íslands (ÍSÍ) sé æðsti aðili frjálsrar íþróttastarfsemi í landinu og sé Keilusamband Íslands eitt af sérsamböndum þess. „Rými sem sérstaklega sé útbúið til iðkunar keilu falli því án nokkurs vafa undir hugtakið íþróttamannvirki í skilningi undanþáguákvæðisins. Undanþágan taki ekki aðeins til afnota af íþróttamannvirkinu sjálfu heldur einnig til afnota búnaðar sem þurfi til að stunda íþróttina.“ Félagið sagði að keilusalurinn sé skýrt afmarkaður frá öðrum rýmum hússins. Þannig t.d. liggi gólf keilusalarins nokkuð neðar en gólf annars rýmis hússins og sé um tröppur að fara milli keilusalar og annars rýmis. Því sé keilusalurinn gjarnan nefndur „gryfjan“, m.a. í kynningarefni. „Skilyrði umræddrar skattundanþágu sé að aðstaða sé seld til íþróttaiðkunar. Í því felist að ekki falli undir undanþáguna útleiga á íþróttamannvirki til annarra nota, svo sem veisluhalda, vörusýninga eða tónleikahalds. Keilubrautir séu svo sértækar til iðkunar keiluíþróttarinnar að þær séu ekki tækar til annarra nota, enda sé ekki um að ræða neina slíka útleigu umræddra keilubrauta.“ Jafnframt er vísað til að í september 2025 hafi byggingarfulltrúi í Reykjavík samþykkt umsókn um skiptingu fasteignarinnar í tvær eindir, annars vegar 0101 keilusal og hins vegar 0201 kvikmyndahús. Veitingaþjónustan geti ekki haft úrslitaáhrif Í úrskurði yfirskattanefndar segir að óumdeilt sé að keila er viðurkennd íþrótt innan ÍSÍ. Á vefsíðu Keilusambands Íslands, sem telst til eins af sérsamböndum ÍSÍ, séu tilgreindir tveir staðir þar sem unnt er að spila keilu á Íslandi, annars vegar í húsnæði Keiluhallarinnar og hins vegar í keilusalnum á Akranesi. Nefndin segir að í úrskurðaframkvæmd hafi keila verið talin til íþróttastarfsemi, sbr. úrskurð yfirskattanefndar nr. 558/1995. Að þessu leyti verður aðstæðum Minigarðsins ekki jafnað saman við aðstæður í máli Keiluhallarinnar. „Verður að telja sýnt fram á að sá hluti húsnæðis kæranda sem nýttur er undir keilubrautir sé nægilega sérgreindur og afmarkaður og verði trauðla nýttur undir annað en iðkun keiluspils. Þá getur ekki haft úrslitaáhrif um virðisaukaskattsskyldu í tengslum við útleigu keilubrauta að iðkendur geti pantað veitingar í sæti sem staðsett eru fyrir aftan keilubrautirnar sjálfar.“ Kaupfélag Skagfirðinga meðal stærstu hluthafa Eignarhald Keiluhallarinnar breyttist á árinu 2023 með kaupum Kaupfélags Skagfirðinga og Háa Kletts, félags Árna Péturs Jónssonar, á Gleðipinnum. Rekstur keiluhallarinnar var í höndum Gleðipinna hf. fram til loka apríl 2023, þegar félagið seldi rekstur hennar og veitingastaðar með kaupsamningi, dags. 2. maí 2023. Sjá einnig Keyptu Gleðipinna á 2,6 milljarða Kaupandi rekstrarins var félagið Leikdagur ehf. sem er í sameinlegri eigu kaupfélagsins, Háa Kletts og seljenda Gleðipinna. Félaginu Gleðipinnum ehf. var slitið með samruna við Leikdaga samkvæmt samrunaáætlun, dags. 28. júní 2024. Uppgjörsdagur samrunans var 1. janúar 2024. Við samrunann tók Leikdagur við skattalegum réttindum og skyldum Gleðipinna hf. Endurákvörðun embættisins var af þessari ástæðu beint að Leikdögum.