Yfir þrjú þúsund laxar gengu í Elliðaárnar í fyrrasumar, sem er hærri tala en þar hefur sést í langan tíma að sögn Guðna Guðbergssonar, fiskifræðings hjá Hafrannsóknastofnun. Guðni segir að hér spili inn í bæði að Elliðaárvirkjun hafi verið lokað þannig að rennsli ánna sé orðið býsna stöðugt og að stjórn Stangaveiðifélags Reykjavíkur hafi ákveðið að frá árinu 2020 yrði öllum veiddum laxi í ánum sleppt. Ákváðu að hætta að drepa lax Guðni Guðbergsson, fiskifræðingur hjá Hafrannsóknastofnun. „Það er líka dálítið merkilegt hvað laxinn hefur þó strögglað í þessum ágætu ám yfir langan tíma þó að hann sé inni í miðri borg. Þegar þarf að sýna fram á að Reykjavík sé græn er Reykjavíkurborg reglulega að slá sér upp á því að það sé laxá í miðri borginni,“ segir Guðni. Að sögn Guðna gekk þáverandi formaður Stangaveiðifélagsins, Jón Þór Ólason, fram fyrir skjöldu eftir kynningu sem hann hafði gefið formanninum um að stofninn í Elliðaánum væri að horfa mjög illa. „Þá var tekin ákvörðun í félaginu um að hætta að drepa lax í Elliðaánum,“ segir hann. Nú sjái menn hvernig þróunin sé. Athyglisvert í ljósi gagnrýni á veiða og sleppa Elliðaár. Ganga, veiði og hrygningarstofn 1935-2025. Virkjunin lokaði 2014 og vatnsmiðlun nánast hætt. V&S frá 2020. Mynd/Guðni Guðbergsson „Það voru yfir þrjú þúsund laxar sem gengu upp í Elliðaárnar í fyrra. Það er orðinn ansi langur tími síðan aðrar eins tölur hafa sést. Það veit á gott og ég held að það sé að minnsta kosti hægt að telja það að þessi ákvörðun hafi verið afskaplega skynsamleg og menn séu að uppskera vegna hennar núna,“ segir Guðni. Á þessu segir Guðni vert að vekja athygli í ljósi gagnrýni sem heyrst hafi um að annars vegar sé ómannúðlegt að veiða og sleppa og hins vegar að sú aðferð skili engu í styrkingu laxastofna. Ekki megi stóla á örfáa fiska „Menn eru sumir að efast um að það skipti máli hvað hrygningarstofnar séu stórir. Meira að segja hefur heyrst að sjö hrygnur í hrygningu væri feikinóg fyrir Elliðaárnar. Þá eru menn að gleyma því að það er líffræðilegur fjölbreytileiki sem þarf að taka tillit til líka,“ segir Guðni. Alls ekki sé hægt að stóla á nokkra einstaklinga í þessum efnum. „Það heitir skyldleikaræktun og það er bara bannað. Það vita allir sem eru í búfjárhaldi að það veit ekki á gott,“ segir Guðni Guðbergsson.