Evrópsk flug­félög og olíu­hreinsunar­stöðvar eru orðin mun bjartsýnni á að álfan komist í gegnum sumar­vertíðina án beins skorts á flug­elds­neyti. Röskun á birgðum frá Mið-Austur­löndum í kjölfar stríðsins við Íran hafði vakið ótta um að flug­félög gætu þurft að draga úr flugi eða glíma við al­var­legan elds­neytis­skort á háannatíma. Nú virðist sú hætta hafa minnkað veru­lega. Michael O’Leary, for­stjóri Ry­anair, sagði á mánu­dag að hann hefði „nánast engar áhyggjur“ af elds­neytis­fram­boði í Evrópu í sumar. Michael O’Leary, for­stjóri Ry­anair, sagði á mánu­dag að hann hefði „nánast engar áhyggjur“ af elds­neytis­fram­boði í Evrópu í sumar. Hann sagði raun­veru­legar áhyggjur hafa verið uppi fyrir einum til tveimur mánuðum, en að staðan hefði batnað. Aukið fram­boð frá Bandaríkjunum, Vestur-Af­ríku og Noregi, auk þess sem sum flug­félög í Mið-Evrópu hafi tekið elds­neyti frá Rúss­landi, þýði að Evrópa ætti að komast í gegnum sumarið. Olíu­hreinsunar­stöðvar hafa brugðist við með því að há­marka fram­leiðslu á flug­elds­neyti, meðal annars með því að stilla fram­leiðslu­ferli þannig að meiri stein­olía, sem er grunnur flug­elds­neytis, fáist úr hverri tunnu af hráolíu. Spænska orku­fyrir­tækið Rep­sol segir að það hafi aukið fram­leiðslu flug­elds­neytis fyrir komandi mánuði um 20 til 25% frá sama tíma í fyrra. Það er óvenju mikil aukning í grein þar sem svigrúm til að færa fram­leiðslu milli elds­neytis­tegunda er venju­lega tak­markað. Antonio Mestre, yfir­maður hreinsunar­starf­semi Rep­sol, segir mark­miðið vera að tryggja að sumar­vertíðin verði dekkuð. Spánn finnur jafnan sér­stak­lega fyrir mikilli eftir­spurn eftir flug­elds­neyti yfir háannatíma ferðalaga. Portúgalska orku­fyrir­tækið Galp segist einnig vera að há­marka fram­leiðslu á flug­elds­neyti og gerir ekki ráð fyrir truflunum á fram­boði á næstu mánuðum. IEA hafði varað við skorti Staðan er betri en óttast var í vor. Yfir­maður Alþjóða­orkumála­stofnunarinnar, IEA, varaði í apríl við því að Evrópa ætti mögu­lega aðeins flug­elds­neyti til sex vikna. Sú sviðs­mynd virðist nú ólík­legri, að mati margra í greininni. British Airwa­ys hefur sagt að félagið hafi næga birgja til að sinna allri sumaráætlun sinni og Air France segir flug­velli sína hafa birgðir til nokkurra mánaða. József Váradi, for­stjóri Wizz Air, segir að þótt hækkandi flug­elds­neytis­verð sé sárs­auka­fullt hafi verðhækkunin hjálpað markaðnum að aðlagast. Hærra verð hafi laðað fram aukinn út­flutning frá bandarískum og ní­gerískum hreinsunar­stöðvum til Evrópu. „Svona markaðsverð virkjar krafta,“ segir hann. Verðið enn mun hærra en fyrir stríð Þótt hætta á beinum skorti hafi minnkað er verðið enn hátt. Flug­elds­neyti í Norður-Evrópu fór í met­verð í byrjun apríl, 1.904 dali á tonn, sam­kvæmt Argus Media. Það var meira en tvöfalt hærra en áður en krísan hófst. Í síðustu viku var verðið komið niður í um 1.328 dali á tonn. Það er samt um 60% hærra en fyrir stríð. Þessi hækkun skiptir miklu fyrir flug­félög, enda er elds­neyti einn stærsti kostnaðar­liður þeirra. Hún getur þrýst á af­komu og leitt til hærra far­gjalda­verðs, jafn­vel þótt beinn elds­neytis­skortur verði ekki raunin. Eu­gene Lind­ell, sér­fræðingur hjá ráðgjafar­fyrir­tækinu FGE Nexan­tE­CA, áætlar að aukin fram­leiðsla evrópskra hreinsunar­stöðva geti bætt við um 100 þúsund tunnum á dag af flug­elds­neyti. Það jafn­gildir um 20% af því magni sem Evrópa flutti inn frá Mið-Austur­löndum fyrir stríðið við Íran. Hann telur jafn­framt að losun neyðar­birgða hjá ríkjum innan IEA geti dekkað um þriðjung af fram­boðs­gatinu í Evrópu á þessu ári. Aukinn inn­flutningur frá Bandaríkjunum, Ní­geríu og öðrum löndum geti fyllt upp í það sem eftir stendur. Eftir­spurn hefur einnig aðeins minnkað. Flug­félög hafa skorið niður nokkrar óarðbærar styttri leiðir og talið er að eftir­spurn eftir flug­elds­neyti í Evrópu á öðrum árs­fjórðungi hafi dregist saman um um 2%. Það er þó langt frá þeirri miklu eftir­spurnar­breytingu sem sumir óttuðust.