Rekstrar­tekjur Eikar námu 3,5 milljörðum króna á fyrsta árs­fjórðungi, þar af voru leigu­tekjur 3,1 milljarður króna. Rekstrar­hagnaður fyrir mats­breytingu, sölu­hagnað og af­skriftir nam 2,2 milljörðum króna og jókst um 21,4% milli ára. Þetta kemur fram í árs­hluta­upp­gjöri Eikar fyrir fyrstu þrjá mánuði ársins. Hreiðar Már Her­manns­son, for­stjóri Eikar, segir árið fara vel af stað. „Við sjáum góðan vöxt í leigu­tekjum, erum að taka góð skref í fjár­mögnun félagsins og höldum áfram að skerpa á eigna­safni okkar,“ segir Hreiðar Már í til­kynningu. Hann segir Festingu standa undir tekju­vexti fjórðungsins. Eik gekk frá kaupum á Festingu á síðasta ári og segir Hreiðar að tök séu komin á rekstur félagsins og inn­leiðing þess í inn­viði Eikar hafi gengið vel. NOI-hlut­fall Eikar, það er rekstrar­hagnaður fyrir mats­breytingu og af­skriftir sem hlut­fall af leigu­tekjum, var 70,7% á fjórðungnum, saman­borið við 69,6% á sama tíma í fyrra. Mats­breyting fjár­festingar­eigna var jákvæð um 2,7 milljarða króna á fjórðungnum og sölu­hagnaður fjár­festingar­eigna nam 26 milljónum króna. Hagnaður fyrir tekju­skatt nam 1,2 milljörðum króna og heildar­hagnaður sam­stæðunnar nam 977 milljónum króna. Hagnaður á hlut var 0,29 krónur. Bók­fært virði fjár­festingar­eigna Eikar nam 175,2 milljörðum króna í lok mars. Heildar­eignir félagsins námu 186,1 milljarði króna og eigið fé 55,7 milljörðum króna. Vaxta­berandi skuldir námu 106,2 milljörðum króna og nettó skuld­setningar­hlut­fall var 58,6%. Eik hefur unnið að endur­fjár­mögnun á árinu. Félagið hefur gefið út þrjá nýja skulda­bréfa­flokka í fjórum út­boðum það sem af er ári, sam­tals að nafn­virði 10,7 milljarðar króna. Þá hefur félagið keypt til baka skulda­bréf að nafn­virði 1,9 milljarðar króna í flokki sem er á loka­gjald­daga í júlí. Hreiðar segir út­gáfuáætlun félagsins hafa farið vel í fjár­festa. Hann nefnir sér­stak­lega skulda­bréfa­flokkinn EIK 120266, sem sé einn lengsti skulda­bréfa­flokkur Kaup­hallarinnar og eigi að verða „hryggjar­stykkið“ í út­gáfum félagsins fram á veginn. „Árangur í út­gáfu þess flokks er mikil trausts­yfir­lýsing markaðarins,“ segir Hreiðar. Eik seldi á fjórðungnum eignina Suður­lands­braut 20, en af­hending fer fram á þriðja árs­fjórðungi. Félagið seldi einnig íbúðar­húsalóð við Foss­veg 3 á Sel­fossi, áður Eyra­veg 44. Hreiðar segir þar með ljúka vel heppnaðri þróun á eign sem áður hýsti starf­semi Húsa­smiðjunnar. „Eigna­safnið verður áfram ítrað, við höfum myndað okkur skoðun á hverri einustu eign í safninu auk þess sem við viljum vera virk á kaup­hliðinni með skýra fjár­festinga­stefnu og arð­semis­mark­mið,“ segir hann. Virðisút­leigu­hlut­fall félagsins var 94,8% í lok fjórðungsins. Hand­bært fé frá rekstri nam 1,5 milljörðum króna og hand­bært fé í lok mars nam 3,5 milljörðum króna. Félagið heldur óbreyttum horfum fyrir árið að teknu til­liti til breytinga á vísitölu neyslu­verðs. Rekstrar­tekjur ársins eru áætlaðar 14,45 til 15,05 milljarðar króna og EBITDA 9,18 til 9,55 milljarðar króna.