Velta í hagkerfinu í janúar og febrúar dróst saman um 5% að raunvirði á milli ára, samkvæmt virðisaukaskattsskýrslum. Uppsafnað á síðustu tólf mánuðum hefur velta dregist saman um 1,3% að raunvirði á milli ára. Bent er á þetta í nýrri hagsjá Landsbankans . Hagfræðideild bankans segir þetta vísbendingu um kólnandi hagkerfi. Einnig er bent á að nýleg gögn um fjölda starfandi sýni að verulega hafi dregið úr fjölgun starfa sem stóð í stað á milli ára í febrúar. Hagstofan birti í gær bráðabirgðatölur um veltu samkvæmt virðisaukaskattsskýrslum. Hagfræðideild Landsbankans bendir á að þróunin hafi verið misjöfn eftir atvinnugreinum. Þannig hafi VSK-velta í framleiðslu málma dregist verulega saman, sem skýrist af bilun í álverinu við Grundartanga sem varð í október á síðasta ári. Jafnframt hafi velta í ferðaþjónustutengdum greinum hefur dregist saman fyrstu mánuði ársins á föstu verðlagi, sem skýrist að stærstum hluta af minna flugframboði eftir fall Play. Aftur á móti hafi velta í sjávarútvegsgreindum verið talsvert meiri í sjávarútvegi, sem rakið er til loðnuveiða og aukinnar veltu í fiskeldi. Þá jókst velta í upplýsingatækni og fjarskiptum verulega, sem er að stórum hluta rakið til aukinnar veltu gagnavera. Þá jókst velta í bílasölu umtalsvert á fyrstu tveimur mánuðum ársins. Hagfræðideild bankans segir að hafa beri í huga að inn í veltutölur vantar upplýsingar um framleiðslu lyfja, en Hagstofan er að skoða grunngögn því tengdu. Sem fyrr segir er einnig komið inn á tölur um fjölda starfandi í hagsjánni. Hagfræðideildin segir að þróunin síðustu mánuði sýni að verulega hafi hægt á í hagkerfinu. „Mun meiri breytileiki er í erlendu vinnuafli en innlendu. Erlent vinnuafl fylgir hagsveiflunni nokkuð vel, því fjölgar mikið þegar hagkerfið er í uppsveiflu, en að sama skapi dregst það saman þegar hægir á.“