Hilmar Örn var í góðu formi á mótinu á Kýpur í dag og átti góða kastseríu. Lengsta kast hans kom í fjórðu tilraun þegar hann kastaði 78,03 metra. Það er bæting á Íslandsmeti hans um 93 sentímetra, en gamla metið hafði staðið frá 2020. Þetta kast skilaði honum í þriðja sætið í mjög sterkri keppni á Kýpur. Sigurvegari varð Volodymyr Myslyvcuk frá Tékklandi sem kastaði 80,69 metra sem er lengsta kast ársins í heiminum. Árangur Hilmars Arnar skilaði honum líka örugglega inn á Evrópumótið í frjálsíþróttum sem verður í Birmingham á Englandi í sumar. Lágmarkið þangað voru 77 metrar. Árangur íslensku sleggjukastaranna á mótinu á Kýpur var með miklum ágætum því Guðrún Karítas Hallgrímsdóttir bætti líka Íslandsmet kvenna í gær.