Það vakti mikla athygli í vor þegar Húrra Reykjavík lokaði öllum fataverslunum sínum. Þær höfðu verið í rekstri í 12 ár og voru með þeim vinsælustu hér á landi. Sindri Snær Jensson, annar stofnandi og eigandi Húrra, sagði í viðtali í Viðskiptablaðinu í apríl að allt hefði verið reynt til að halda áfram en að rekstrarumhverfið hefði versnað jafnt og þétt á undanförnum árum og það hefði orðið til þess að sjálfstæðum sérverslunum væri nærri ókleift að standa undir starfseminni. Óvenju mörg verslunarbil standa tóm í Kringlunni, en hvað gerir rekstrarumhverfið svona erfitt? Tveir reynsluboltar í verslunarrekstri, þær Tinna Hemstock sem rekur skóbúðina Apríl og Karin Kristjana Hindborg eigandi snyrtivöruverslunarinnar Nola, kíktu í Fram undan á Rás 2 og sögðu frá. Þurfa að flytja rekstur í úthverfin Tinna segir erfiðara að reka verslun núna en fyrir nokkrum árum. „Það er þyngri leiga, meiri launakostnaður og allt hefur hækkað, flutningur og allt. Maður þarf að flytja sig í úthverfin, það er erfitt að vera á þessum vinsælu fjölförnu stöðum í þessu árferði.“ Máta, fá þjónustu og panta erlendis Apríl var í Kringlunni en þeirri verslun var lokað í byrjun janúar. Tinna segir að það hafi einfaldlega verið of dýrt að reka litla sérverslun þar. „Við fáum alveg góða traffík á Garðatorgi þegar maður er með svona öðruvísi vörur. Maður er að fá umferðina þangað en það hefur mjög margt breyst með svona erlendum vefverslunum. Það er erfitt að keppa við það. Íslendingar eru jafnvel að koma að máta, fá þjónustuna á Íslandi og panta svo erlendis.“ Ódýrara að fá enga þjónustu Karin tekur undir það. Hún segist áður hafa heyrt kollega sína sem reka fataverslanir tala um málið, en nú er hún sjálf byrjuð að finna fyrir þessu. „Þetta er ömurleg þróun bara vægast sagt.“ Hún segist skilja fólk að versla stundum á internetinu, það geri hún sjálf en að fólk þurfi að átta sig á hvers vegna það sé ódýrara. Ef þú ætlar að versla vöru á netinu sem fæst í verslun hér heima á Íslandi ekki þá fara í verslunina og stela þjónustunni. Þú ert að fá þetta ódýrara á netinu og það er ástæða fyrir því, það er engin þjónusta. Þú ert ekki að labba inn í verslun. Karin segist hafa lent í að fá konu inn í verslun til sín sem óskar eftir þjónustu. Karin hafi aðstoðað hana í um klukkutíma, boðið henni kaffi, nýtt reynslu sína, menntun og sérfræðiþekkingu. Ég setti hana í stólinn hjá mér og sýndi á henni makeup, gaf henni tips og tricks hvernig hún gæti gert þetta sjálf. Ég sýndi henni alls konar vörur, gaf henni prufur, svaraði sautján þúsund spurningum. Svo fæ ég takk æðislega, þetta er besta þjónusta sem ég hef fengið og ég vissi að ég gæti treyst á þig. Ég er einmitt að fara að setja í körfu á Boozt, eða frænka mín er flugfreyja og græjar þetta úti. Stelur þjónustunni af mér. Hún segir að fólk vilji þjónustuna en það vilji ekki borga fyrir hana. Það sé ekkert annað en rán að þiggja hana og leita svo annað til að fá vöruna ódýrari. „Við eigum svo sannarlega skilið að fá laun fyrir vinnuna okkar.“ Elska að fara inn í verslun og fá góða þjónustu Tinna tekur undir að þetta sé að aukast og að fólk þurfi að spyrja sig hvort það vilji hafa verslanir á Íslandi. Sjálf fer hún oft inn í verslanir og þiggur þjónustu og nýtur þess að geta keypt vöruna strax. „Ég vil geta farið í búð á Íslandi og mátað, fengið þjónustu, skoðað efnið og fengið vöruna strax.“ Karin tekur undir það: „Það er dýrmætt að geta labbað inn í verslun og fengið persónulega og fagmannlega þjónustu. Ég elska að geta farið inn í búð, fengið þetta samtal og nákvæmlega það sem mig vantar.“ Viljum líka minni verslanir á Íslandi Karin segir að það hafi margir fengið sjokk þegar Húrra lokaði. „Það var svolítið veldi, ótrúlega vinsælt og flott og ég held að margir hafi verið bara ókei þetta er búið hjá þeim.“ Það sé ástæða til þess að staldra við og hugsa hvað sé að breytast. Þegar Tinna opnaði Apríl í Kringlunni hafði hún verið á biðlista eftir plássi. Síðan hún lokaði í janúar hefur hins vegar enginn opnað í rýminu sem hún var í. Rekstrarumhverfið sé sífellt erfiðara. „Þetta er áhyggjuefni því við viljum hafa verslanir á Íslandi og líka litlar, ekki bara stórar og erlendar. Þetta er skrýtin þróun,“ segir hún. Sjarmerandi litlir verslunarkjarnar í úthverfum Karin segir að það stefni í að verslunarmiðstöðvar séu bara fyrir „risana“ sem séu með ofboðslega mikið fjármagn á bak við sig en litli maðurinn deyi út. Hún tekur þó fram að hún sé afar ánægð í Ármúlanum. „Ég hef verið þar í átta ár núna, þetta er mjög miðsvæðis, nálægt Skeifunni, þú getur komist í allar áttir. Ég er með bílastæði beint fyrir utan sem hefur mikið að segja,“ segir hún. „Ég held að í dag þurfirðu ekki endilega að vera á einhverjum fjölförnum stað þar sem að allir eru. Eins og Tinna var að segja eru margar verslanir að fara í úthverfin. Ég held að kúnninn komi bara til þín ef það vill fá eitthvað frá þér.“ Tinna segist fyrst hafa fengið hnút í magann yfir að vera að opna verslun á Garðatorgi því hún vissi ekki hvort það væri besta staðsetningin. „En þetta hefur gengið ótrúlega vel. „Maður fær líka ótrúlega góðan kúnnahóp úr nærumhverfinu, þau elska að geta bara stokkið á Garðatorg og verslað,“ segir hún. „Mér finnst mjög sjarmerandi að það séu að myndast litlir verslunarkjarnar í úthverfum og aðeins fyrir utan bæinn. Það er skemmtileg þróun.“ Í samkeppni við allan heiminn Hún segist þó ekki vera í samkeppni bara við búðir í nágrenninu heldur heiminn allan, og það sé flókið. „Við erum ekki lengur að keppa bara við næstu búð á horninu heldur við umheiminn. Með einum smelli er hægt að versla hvar sem er svo samkeppnin er orðin allt öðruvísi.“ Og nú fylgir rekstrinum að vera sýnilegur á samfélagsmiðlum að minna á sig. „Maður þarf að berjast meira fyrir að fá kúnnann til sín með því að vera á samfélagsmiðlum, pósta á hverjum degi og segja frá,“ segja þær. Verslunareigendur lenda æ oftar í að fólk kemur inn í verslunina, nýtir sér alla þjónustu sem býðst og yfirgefur hana með þeim orðum að það ætli að kaupa vörurnar ódýrari á netinu. Þetta er meðal þess sem þyngir rekstrarumhverfi verslana.