Út­gáfa nýrra kaup­hallar­sjóða í Bandaríkjunum stefnir í met­ár. Alls voru 728 nýir sjóðir settir á markað á fyrstu sex mánuðum ársins sam­kvæmt tölum CFRA Research, að því er fram kemur í um­fjöllun The Wall Street Journal. Fjölgunin skýrist meðal annars af breyttu reglu­verki, tækni­fram­förum og skatta­legum hvötum. Stærsti drif­krafturinn er þó áhugi fjár­festa á næsta stóra fjár­festingarþema. Sjóðastýringar­fyrir­tæki setja gjarnan tugi nýrra sjóða á markað í von um að einn þeirra nái miklum vinsældum. Eric Balc­hunas, sér­fræðingur Bloom­berg í kaup­hallar­sjóðum, líkir að­ferðinni við að leggja undir á hverja einustu tölu við rúllettu­borð. Sér­hæfðir þema­sjóðir hafa verið áberandi, meðal annars sjóðir tengdir geim­ferðum, vél­mennum og tölvu­minni. Þá hefur fjölgað hratt í skuld­settum sjóðum og sjóðum sem veðja á lækkun ein­stakra hluta­bréfa. Slíkir sjóðir geta skilað miklum hagnaði á skömmum tíma en áhættan er að sama skapi mikil. Sumir eru hannaðir til skammtíma­við­skipta og geta tapað verðmætum hratt við miklar markaðs­sveiflur. Stærsti hluti greinarinnar er þó áfram undir­lagður af ein­földum og ódýrum vísitölu­sjóðum. S&P 500-sjóður Vangu­ard fór ný­lega yfir eitt þúsund milljarða dala í eignum og hundrað stærstu kaup­hallar­sjóðirnir ráða saman­lagt yfir um tíu þúsund milljörðum dala. The Wall Street Journal varar við því að fjöldi smárra sjóða muni að líkindum verða lagður niður á næstu misserum. Það geti komið fjár­festum á óvart og í sumum til­vikum kallað fram óvæntar skatt­greiðslur. Niður­staða blaðsins er sú að það geti verið skyn­sam­legt fyrir sjóðastýringar­fyrir­tæki að stofna marga sjóði og vonast til að einn slái í gegn. Fyrir fjár­festa sé sama veðmál hins vegar sjaldnast jafn hagstætt.