Helstu áskoranir við framkvæmd aðgerðaáætlunar til að sporna gegn sýklalyfjaónæmi tengjast fjármögnun verkefna, takmörkuðum mannafla og óvissu um áframhaldandi fjármögnun. Þetta kemur fram í ársskýrslu um framkvæmd aðgerðaráætlunarinnar . Þá segir að umfang undirbúningsvinnu hafi í sumum tilvikum reynst meira en gert hafði verið ráð fyrir. Sýklalyfjaónæmi er ein stærsta heilbrigðisógn sem heimurinn stendur frammi fyrir í dag. Árið 2025 var gerð aðgerðaráætlun til að sporna gegn sýklalyfjaónæmi sem tekur til ársins 2029. Áætlunin inniheldur sex aðgerðir sem fela í sér 24 markmið og 75 verkefni. Sex aðgerðir sem aðgerðaáætlunin byggir á Stuðla að markvissri og skynsamlegri notkun sýklalyfja hjá mönnum og dýrum. Takmarka útbreiðslu sýklalyfjaónæmis með upplýsingagjöf, fræðslu og forvörnum. Bæta þekkingu á sýklalyfjaónæmi með vöktun og vísindarannsóknum. Hefta útbreiðslu sýklalyfjaónæmis með íhlutandi aðgerðum. Auka þátttöku í alþjóðlegu samstarfi um aðgerðir gegn sýklalyfjaónæmi. Tryggja samhæfingu og stjórn aðgerða gegn sýklalyfjaónæmi til framtíðar. Sýklalyfjaónæmi er ekki eins stórt vandamál hér á landi og annars staðar, segir í tilkynningu Stjórnarráðsins en ógnin fer vaxandi á hverju ári. Innleiðing aðgerðaráætlunarinnar hófst í fyrra með undirbúnings- og uppbyggingarvinnu á borð við gagnasöfnun, vöktun, sýklalyfjagæslu og samræmingu verkefna og verklags milli ábyrgðaraðila. Undir lok árs voru mörg verkefni enn á undirbúnings- eða þróunarstigi og framgangur verkefna var almennt hægari en gert var ráð fyrir. Ábyrgðaraðilar skýrslunnar nefna skort á fjármagni, takmarkaðan mannafla og umfangsmikla undirbúningsvinnu sem helstu ástæður tafanna. Sum verkefni fengu lægri fjárveitingu en gert var ráð fyrir. Þá er skortur á fyrirsjáanlegri langtímafjármögnun sagður hægja á framkvæmd verkefna og takmarka möguleika stofnana til langtímauppbyggingar, til dæmis með ráðningu sérhæfðs starfsfólks.