Akkur hækkar af­komu­spá sína fyrir Icelandair á árinu 2026 þrátt fyrir að upp­gjör félagsins fyrir annan árs­fjórðung hafi verið mun lakara en greiningar­fyrir­tækið gerði ráð fyrir. Í nýrri greiningu Akkurs er upp­gjör Icelandair metið blandað en neikvætt. Af­koman var langt undir spá en von­brigðin lágu fyrst og fremst í elds­neytis­kostnaði. Á móti komu tekjur, sætanýting og eininga­tekjur sterkari inn en gert hafði verið ráð fyrir. Hlutabréfaverð Icelandair féll um rúm 3% við opnun markaða . Icelandair var með 15,4 milljóna dala jákvæða EBITDA á öðrum árs­fjórðungi. Akkur hafði hins vegar spáð 37,7 milljóna dala EBITDA og var niður­staðan því 22,3 milljónum dala undir spá. Rekstrar­tap nam 29,6 milljónum dala, saman­borið við 10,3 milljóna dala rekstrar­tap í spá Akkurs. Tap tíma­bilsins nam 32,3 milljónum dala, en Akkur hafði spáð 11,2 milljóna dala tapi. Sjá einnig Icelandair tapaði 4 milljörðum þrátt fyrir met­tekjur Akkur segir frávikið frá spá að mestu skýrast af elds­neyti. Virkt elds­neytis­verð hafi verið 1.224 dalir á tonn, saman­borið við um 975 dali í spá greiningar­fyrir­tækisins. Akkur telur lík­legt að þar hafi spilað saman eins mánaðar töf í kostnaðarfærslu elds­neytis og miklar sveiflur í elds­neytis­verði innan fjórðungsins. Sterkari tekju­horfur vega á móti Tekju­hliðin var hins vegar sterkari. Tekjur Icelandair námu 496,2 milljónum dala á fjórðungnum, sem var 10 milljónum dala yfir spá Akkurs og 7,2% aukning frá sama tíma í fyrra. Sætanýting var 84%, saman­borið við 82,2% á öðrum fjórðungi í fyrra. Sam­kvæmt út­reikningum Akkurs jukust tekjur á hvern fram­boðinn sætiskíló­metra um 8,6% milli ára og meðal­tekjur á hvern farþega­kíló­metra hækkuðu um 6,2%. Fram­boð félagsins, mælt í fram­boðnum sætiskíló­metrum, dróst á sama tíma saman um 1,3%. Akkur segir að tekjuþróunin bendi til þess að Icelandair hafi náð fram hærri tekjum á hvert sæti eftir brott­hvarf Play af markaði. Greiningar­fyrir­tækið bendir á að tekjur hafi verið met­tekjur á fjórðungnum og að eininga­tekjur hafi hækkað þrátt fyrir minna fram­boð. Horfur fyrir þriðja árs­fjórðung séu jafn­framt sterkar. Icelandair hefur leiðbeint um meteinunga­tekjur á þriðja fjórðungi, eða 11–15% hækkun, á sama tíma og fram­boð félagsins minnkar um 5%. Akkur bendir einnig á að fram­boð um Kefla­víkur­flug­völl dragist saman um 10%. Þá telur Akkur að tekjuáhætta á þriðja árs­fjórðungi hallist fremur til hins jákvæða. Fyrir­fram­greiddar tekjur Icelandair hafi aukist um 201 milljón dala það sem af er ári, saman­borið við 181 milljón dala á sama tíma í fyrra. Kostnaðar­hliðin er þó áfram veik­leiki. Eininga­kostnaður hækkaði um 16,4% milli ára og eininga­kostnaður án elds­neytis um 8%. Akkur bendir þar meðal annars á 14% hækkun viðhalds­kostnaðar, 4,9 milljóna dala kostnað vegna raskana í rekstri og 9,6 milljóna dala neikvæð gengisáhrif. Meta virði félagsins um 127% yfir markaðsvirði Þrátt fyrir veikan annan árs­fjórðung hækkar Akkur af­komu­spá sína fyrir árið í heild. Greiningar­fyrir­tækið gerir nú ráð fyrir 202,7 milljóna dala EBITDA á árinu 2026, saman­borið við fyrri spá um 196,7 milljónir dala. Spá um rekstrar­hagnað hækkar úr 11 milljónum dala í 19,9 milljónir dala. Skýringin liggur meðal annars í betri horfum fyrir seinni hluta ársins. Akkur bendir á sterka leiðbeiningu fyrir þriðja árs­fjórðung, hagstæðari elds­neytis­stöðu og virði elds­neytis­varna. Um 47% af áætlaðri elds­neytisþörf félagsins á seinni hluta ársins eru tryggð á 684 dali á tonn og elds­neytis­varnir félagsins eru metnar 28 milljónum dala yfir markaðsvirði. Akkur segir fjár­festingar­söguna um Icelandair því standa þrátt fyrir slakan annan fjórðung. Greiningar­fyrir­tækið heldur óbreyttri kaupráðgjöf á bréfum félagsins en tekur fram að ráðgjöfin sé spá­kaup­mennsku­tengd. Verðmat Akkurs er 1,67 krónur á hlut, saman­borið við 0,736 króna loka­gengi fyrir birtingu greiningarinnar. Munurinn nemur 127%. Akkur segir næstu lykil­at­riði vera hvort Icelandair nái að skila þeim eininga­tekjum sem félagið leiðbeinir um á þriðja fjórðungi, hvernig elds­neytis­kostnaður færist í bókum félagsins, hvort lausn finnist í kjara­viðræðum við flug­virkja og hvaða kostnaður og sparnaður fylgi því að Boeing 757-vélarnar verði teknar úr rekstri hraðar en áður var áætlað. Icelandair hyggst ljúka notkun Boeing 757-vélanna í janúar 2027. Fjórar Air­bus A320neo-vélar eiga að bætast við flotann á fyrri hluta næsta árs. Að mati Akkurs geta þær breytingar stutt við af­komu félagsins, en elds­neytis­verð og fram­vinda elds­neytis­varna verða áfram stærstu sveiflu­valdar í spánni.