Icelandair tapaði 32,3 milljónum dala, jafn­virði um rúmra 4 milljarða króna, á öðrum árs­fjórðungi. Á sama tíma­bili í fyrra hagnaðist félagið um 12,9 milljónir dala. Tekjur Icelandair jukust engu að síður um 7% milli ára og námu 496,2 milljónum dala, jafn­virði um 61,4 milljarða króna. Þetta eru mestu tekjur sem félagið hefur skilað á einum árs­fjórðungi. Afkoman var einnig talsvert undir opinberri afkomuspá Akkurs. Greiningarfyrirtækið hafði gert ráð fyrir 11,2 milljóna dala tapi og neikvæðri EBIT-afkomu upp á 10,3 milljónir dala. Raunverulegt tap var því nær þrefalt meira en Akkur spáði og EBIT-afkoman um 19,3 milljónum dala lakari. Tekjurnar voru hins vegar um tíu milljónum dala meiri en í spá Akkurs. Rekstrar­af­koma fyrir fjár­magns­liði og skatta, EBIT, var neikvæð um 29,6 milljónir dala, eða um 3,7 milljarða króna. Til saman­burðar var EBIT-af­koman jákvæð um 0,8 milljónir dala á öðrum árs­fjórðungi síðasta árs. Heildar­rekstrar­kostnaður án af­skrifta jókst um 15% milli ára og nam 480,8 milljónum dala. Kostnaðurinn jókst því mun hraðar en tekjurnar og þurrkaði út ávinninginn af auknum tekjum, hærri far­gjöldum og betri sætanýtingu. Elds­neytiskostnaður jókst um rúma fimm milljarða Mikil hækkun elds­neytis­kostnaðar hafði mest áhrif á af­komuna. Kostnaður vegna elds­neytis jókst um 72,5 milljónir dala milli ára áður en tekið er til­lit til elds­neytis­varna.Að teknu til­liti til hagnaðar af elds­neytis­vörnum nam kostnaðar­aukningin 41 milljón dala, eða um 5,1 milljarði króna. Heildar­elds­neytis­kostnaður nam 136,5 milljónum dala og jókst um 43% milli ára þrátt fyrir að fram­leiðsla félagsins hefði dregist saman um 1,3%. Bogi Nils Boga­son, for­stjóri Icelandair, segir af­komuna hafa verið í samræmi við spá félagsins þrátt fyrir krefjandi rekstrar­um­hverfi. Sjá einnig Milljarða högg „Rekstrar­um­hverfið var krefjandi á öðrum árs­fjórðungi vegna mikillar hækkunar elds­neytis­verðs. Við náðum samt sem áður góðum árangri á mörgum sviðum og var af­koman í takt við af­komu­spá okkar fyrir fjórðunginn. Við skiluðum met­tekjum og ef hækkun elds­neytis­kostnaðar er tekin út fyrir sviga náðum við undir­liggjandi EBIT rekstrar­bata á milli ára.“ Icelandair bendir á að undir­liggjandi arð­semi hafi batnað milli ára þegar áhrif hækkunar elds­neytis­verðs eru undan­skilin. Þar hafi vegið þungt hækkun far­gjalda, góð sætanýting og aukin áhersla á arðbærustu markaðina til og frá Ís­landi. Eininga­kostnaður án elds­neytis hækkaði þó einnig um 7% milli ára, eða um 4,5% miðað við fast gengi. Félagið rekur hækkunina meðal annars til aukins viðhalds­kostnaðar, kostnaðar vegna röskunar á flugi og óhagstæðrar gengisþróunar. Eininga­kostnaður með elds­neyti hækkaði um 15%. Bogi segir félagið hafa brugðist við stöðunni með því að aðlaga fram­boð, hækka far­gjöld og herða kostnaðaraðhald. Þá hefur verið ákveðið að hætta rekstri Boeing 757-flug­véla fyrr en áður var áætlað. Kostnaður vegna ETS jókst um helming Kostnaður Icelandair vegna við­skipta­kerfis Evrópu­sam­bandsins með losunar­heimildir, ETS, nam 10,3 milljónum dala á fjórðungnum, jafn­virði um 1,3 milljarða króna. Kostnaðurinn nam 6,9 milljónum dala á sama tíma­bili í fyrra og jókst því um 3,5 milljónir dala, eða um 50%. Félagið segir hækkunina einkum skýrast af fækkun endur­gjalds­lausra losunar­heimilda, hlut­falls­lega fleiri flug­ferðum til Evrópu og lítil­lega hærra markaðsverði heimildanna. Á sama tíma dróst kol­tvísýrings­losun á hvern flutnings­einingar­kíló­metra saman um 5%. Bogi sagði í sam­tali við Við­skipta­blaðið í síðustu viku jákvætt að sér­lausn Ís­lands í ETS-kerfinu yrði fram­lengd til ársins 2030. Hann lagði þó áherslu á að enn þyrfti að finna varan­lega lausn. „Það er jákvætt að sér­lausnin sé fram­lengd og að áfram sé tekið til­lit til sér­stöðu Ís­lands hvað þetta varðar. Engu að síður höfum við, ásamt stjórn­völdum, talað fyrir því að nauð­syn­legt sé að fá varan­lega lausn. Það er erfitt að byggja rekstur á tíma­bundnum lausnum.“ Hækkun kostnaðar vegna losunar­heimilda sýnir vaxandi vægi kol­efnis­gjalda í rekstri félagsins, þótt elds­neytis­verðið hafi haft mun meiri áhrif á af­komu fjórðungsins. Af­bókanir kostuðu félagið 600 milljónir Af­bókanir vegna skorts á áhöfnum í maí og júní höfðu einnig tölu­verð áhrif á reksturinn. Þær juku kostnað félagsins um 2,6 milljónir dala og leiddu að mati Icelandair til 2,3 milljóna dala tekju­taps. Heildaráhrifin námu því 4,9 milljónum dala, eða rúm­lega 600 milljónum króna. Veður­tengdar truflanir um páska juku kostnað enn frekar. Launa­kostnaður jókst um 7% og nam 132,4 milljónum dala. Félagið rekur aukninguna til samnings­bundinna launa­hækkana og sterks raun­gengis krónunnar. Miðað við fast gengi jókst launa­kostnaður um 3%. Starfs­manna­fjöldi var hins vegar nær óbreyttur milli ára. Sjá einnig Spá tapi hjá Icelandair á öðrum árs­fjórðungi Fleiri farþegar og hærri far­gjöld Farþega­tekjur Icelandair jukust um 7% og námu 421,3 milljónum dala. Alls flutti félagið rúm­lega 1,4 milljónir farþega á fjórðungnum, 2% fleiri en á sama tíma í fyrra. Sætanýting nam 84% og jókst um 1,9 pró­sentu­stig. Meðal­far­gjöld hækkuðu um 5% og eininga­tekjur um 9%. Farþegum frá Ís­landi fjölgaði um 17% og farþegum til landsins um 3%. Tengi­farþegum, sem ferðast um Kefla­víkur­flug­völl á milli Evrópu og Norður-Ameríku, fækkaði hins vegar um 4%. „Tekjur á hvern seldan sætiskíló­metra hækkuðu og var sætanýting, ásamt stund­vísi, áfram góð,“ segir Bogi. Stund­vísi var þó lakari yfir fjórðunginn í heild en fyrir ári. Hún nam 82,8% saman­borið við 87,2% í fyrra, en batnaði eftir því sem leið á tíma­bilið og náði 84,9% í júní. Spáir met­tekjum á hverja fram­leiðslu­einingu Icelandair gerir ráð fyrir að EBIT-af­koma þriðja árs­fjórðungs batni frá fyrra ári. Félagið áætlar að fram­boð dragist saman um 5% en að eininga­tekjur aukist um 11–15%. Eininga­kostnaður án elds­neytis er hins vegar talinn hækka um 5–8% miðað við fast gengi. Félagið segir horfur fyrir fjórða árs­fjórðung og árið í heild áfram háðar tölu­verðri óvissu vegna sveiflna í verði flug­véla­elds­neytis. Bogi segir eftir­spurn mikla til og frá Ís­landi og að hún nái há­marki í kringum sól­myrkvann í ágúst. „Tekju­horfur á þriðja árs­fjórðungi eru góðar og gerum við ráð fyrir að eininga­tekjur verði þær hæstu í sögu félagsins. Eftir­spurn er mikil til og frá Ís­landi og nær há­punkti til Ís­lands í kringum sól­myrkvann í ágúst. Þá gerum við ráð fyrir að EBIT á þriðja árs­fjórðungi muni batna milli ára.“ Lausafé Icelandair nam 603,6 milljónum dala í lok júní, jafn­virði um 76,3 milljarða króna. Þar af námu hand­bært fé og markaðsverðbréf 511,6 milljónum dala og ónýttar lána­línur 92 milljónum dala. Eigið fé nam 229,8 milljónum dala og eigin­fjár­hlut­fallið var 10,5%.