Breski eignastýringar­sjóðurinn Rat­hbones Asset Mana­gement hefur selt hluta af breskum ríkis­skulda­bréfum sínum af ótta við að Andy Burn­ham, væntan­legur for­sætis­ráðherra Bret­lands, ýti undir nýtt ójafn­vægi á skulda­bréfa­markaði með út­gjaldaá­formum sínum. David Coombs, yfir­maður ­fjár­festinga hjá Rat­hbones, segir sjóðinn hafa minnkað stöðu sína í löngum ríkis­skulda­bréfum til að verja sig gegn áhættu af óábyrgri stefnu í ríkis­fjár­málum. „Breski ríkis­skulda­bréfa­markaðurinn setur okkur í erfiða stöðu núna. Annars vegar er hættan sú að Burn­ham fari sömu leið og Truss eða skipi að minnsta kosti fjár­málaráðherra sem er lausari í ríkis­fjár­málum en Rachel Ree­ves,“ segir Coombs, sam­kvæmt Bloom­berg en ummælin voru höfð eftir honum áður greint var frá skipun John Healy. Sjá einnig Nýr fjár­málaráðherra skipaður í Bret­landi Hann vísar þar til skamm­vinnrar for­sætis­ráðherratíðar Liz Truss haustið 2022, þegar ófjár­magnaðar skattalækkanir í fjár­lögum leiddu til snarpra hækkana á ávöxtunar­kröfu breskra ríkis­skulda­bréfa og mikils óróa á mörkuðum. Ávöxtunar­krafa tíu ára breskra ríkis­bréfa fór yfir 5% á þriðju­dag, í fyrsta sinn frá því í maí. Hún hafði verið 4,87% í lok síðustu viku. Hærri fjár­mögnunar­kostnaður ríkisins eykur þrýsting á Burn­ham um að sann­færa fjár­festa um að hann ætli ekki að ráðast í ófjár­magnaða út­gjalda­aukningu. Rat­hbones er ekki eini fjár­festirinn sem hefur dregið úr áhættu gagn­vart breskum ríkis­bréfum. Í maí seldi Aber­deen Invest­ments hluta af bresku ríkis­bréfa­safni sínu eftir slæma út­komu Verka­manna­flokksins í sveitar­stjórnar­kosningum, sem jók líkur á leið­toga­slag innan flokksins. Eftir af­sögn Keirs Star­mer í júní vöruðu fleiri fjár­festar, þar á meðal RBC BlueBay, við því að þeir myndu forðast bresk ríkis­bréf vegna aukinna sveiflna. Lloyd Har­ris, yfir­maður skulda­bréfa­fjár­festinga hjá Premi­er Miton Investors, segir sjóðinn einnig hafa selt bresk ríkis­bréf eftir fyrstu stóru stefnuræðu Burn­hams í Manchester. „Hann ætlar að sækja vöxt í hverju einasta póstnú­meri. Það er ekki mikið aðhald í því. Ein­falda spurningin er hvort við viljum taka mikla áhættu í breskum ríkis­bréfum. Svarið er nei,“ segir Har­ris. Burn­ham hefur sagt sig skuld­bundinn fjár­laga­reglum Rachel Ree­ves, sem gera ráð fyrir að dag­leg út­gjöld ríkisins séu fjár­mögnuð með skatt­tekjum. Gagn­rýn­endur telja þó hættu á að sú skuld­binding veikist hratt. Burn­ham hefur meðal annars lofað skattalækkunum fyrir tekjulága og um tíma gefið í skyn að hann gæti bætt svo­kölluðum Wa­spi-konum tjón, sem gæti kostað ríkis­sjóð milljarða punda. Sjá einnig Skatta­hækkanir sagðar óum­flýjan­legar hjá Burn­ham Ref­orm UK heldur því fram að Burn­ham muni þurfa að hækka skatta á efna­meiri Breta um 38 milljarða punda til að standa undir út­gjaldaá­formum sínum. Rat­hbones hefur ekki yfir­gefið bresk ríkis­bréf al­farið. Coombs segir sjóðinn enn eiga tals­vert í styttri og meðallöngum ríkis­bréfum, sem séu síður viðkvæm fyrir pólitískri áhættu og bjóði háa nafn­vexti. Hann segir sjóðinn jafn­framt hafa dreift ríkis­skulda­bréfaáhættu sinni meira til Nýja-Sjálands, Ástralíu, Noregs og ný­lega Bandaríkjanna, vegna þess að láns­hæfisáhætta Bret­lands sé nú meiri en áður. Sam­kvæmt nýjustu gögnum Rat­hbones lækkaði hlut­fall breskra ríkis­bréfa í Multi-Asset Stra­tegic Growth-safni sjóðsins úr 9,2% í desember í 6% í maí.