Andy Burn­ham, nýr for­sætis­ráðherra Bret­lands, hefur skipað John Heal­ey nýjan fjár­málaráðherra í óvæntri ráðstöfun sem hefur verið vel tekið af for­ystumönnum breska hersins. Heal­ey var áður varnar­málaráðherra en sagði af sér í síðasta mánuði og sakaði þá fjár­málaráðu­neytið um að vilja ekki verja því fé sem þyrfti til að halda Bret­landi öruggu. Endur­koma hans í ríkis­stjórnina er því talin skýr vís­bending um að Burn­ham hyggist auka út­gjöld til varnar­mála. Ed Mili­band, sem hafði verið nefndur sem mögu­legur fjár­málaráðherra, verður þess í stað utan­ríkis­ráðherra. Telegraph segir að sú skipan kunni að valda spennu í sam­skiptum við ríkis­stjórn Donalds Trump í Bandaríkjunum, meðal annars vegna áherslu Mili­bands á lofts­lags­mál og fyrri gagn­rýni hans á stjórn­mál Trumps. Heal­ey tekur við fjár­málaráðu­neytinu við erfiðar aðstæður. Lán­taka breska ríkisins reyndist meiri en opin­berar spár gerðu ráð fyrir áður en Burn­ham flutti inn í Downingstræti. Á tíma­bilinu apríl til júní tók ríkið 57,6 milljarða punda að láni, 2,7 milljörðum punda meira en fjár­laga­stofnunin OBR hafði spáð í mars. Opin­berar skuldir Bret­lands eru nú komnar yfir 2.900 milljarða punda, eða sem nemur 94,9% af lands­fram­leiðslu. Skulda­hlut­fallið er nálægt því hæsta sem sést hefur frá því snemma á sjöunda ára­tug síðustu aldar. Fjárfestar veðja á aukin útgjöld í varnarmál Heal­ey sagðist við skipanina ætla að koma á „aga í ríkis­fjár­málum“ og vinna náið með for­sætis­ráðherranum að því að draga úr fram­færslu­kostnaði heimila án þess að glata trúverðug­leika gagn­vart mörkuðum. Markaðir brugðust einnig við stjórnar­mynduninni og ákvörðun nýrrar ríkis­stjórnar um að lækka virðis­auka­skatt á orku­reikninga heimila. Ávöxtunar­krafa breskra ríkis­skulda­bréfa hafði farið yfir 5% á mánu­dag eftir að Burn­ham sagðist ætla að taka sveigjan­legri af­stöðu til fjár­laga­reglna ríkisins, en hún lækkaði lítil­lega á þriðju­dag. Varnar­mála­fyrir­tæki hækkuðu í verði eftir skipan Hea­leys. Hluta­bréf Babcock hækkuðu um tæp 7% í upp­hafi við­skipta, Qi­netiQ um meira en 4% og BAE Sy­stems um 3%. Rolls-Royce hækkaði einnig og fór í nýtt met. Fjár­festar virðast veðja á að nýr fjár­málaráðherra muni greiða fyrir auknum út­gjöldum til hersins og hraða samningum við breska varnariðnaðinn.