Gagnaverin eru farin að banka upp á hér á landi segir umhverfissérfræðingur. Ódýr orka ásamt aðgengi að köldu loftslagi og vatni skapar kjöraðstæður fyrir slíka starfsemi. Áhugi fyrir því að setja upp gagnaver á Íslandi „Framtíðin er í þessu, það er bara þannig og við þurfum öll að horfast í augu við það. En ég held að því betur sem við getum undirbúið okkur eða vandað okkur að þá getum við mögulega gert þetta þannig að það verði hagur fyrir nærsamfélagið og umhverfisáhrifum verði haldið í lágmarki,“ segir Elísabet Björney Lárusdóttir, umhverfissérfræðingur hjá Sambandi sunnlenskra sveitarfélaga. Áhugi er fyrir því að setja upp gagnaver á Íslandi því hér er ódýr, hrein og græn orka, ásamt kæliáhrifum vegna legu landsins. Orkufrek en gefa líka frá sér varma Samtök sunnlenskra sveitarfélaga hlutu nýlega átján milljóna króna styrk úr Norðurslóðaáætlun Interreg NPA til að styðja sveitarfélög og svæði á norðurslóðum við að undirbúa, stýra og skipuleggja uppbyggingu gagnavera á sjálfbæran og upplýstan hátt. Áætlaður verktími er tvö og hálft ár. „Þau eru orkufrek, þau eru það, en þau gefa frá sér varma líka og það er eitthvað sem mér finnst mjög áhugavert að skoða, hvernig gagnaverið sem kæmi, hversu mörg megavött það tæki. Getum við vistað gagnaver á köldu svæðunum okkar, við erum með köld svæði á Suðurlandi. Getum við nýtt hitann í gróðurhús eða hitaveitu,“ segir Elísabet. Það sé jafnframt mikilvægt að skoða málin út frá öllum hliðum áður en ákvarðanir eru teknar. „Mun það taka yfir það afl sem sveitarfélögin geta tekið á móti og verður það þá til þess að önnur starfsemi, eða hvað sem það verður, hefur þá ekki pláss inni í samfélaginu.“